Bible in duytsche (Delftse bijbel 1477)

§ Capit .li.

1

HOert mi die nauolghet dat gherecht is: ende die den here soect. Verstaet te dien stene daer ghi of ghehouwen sijt: ende te dien hole vanden kule daer ghi of ghesneden sijt.

2

Merct te abraham uwen vader: ende te saren die v ghebaerde. Want enen riep ic: ende benedide hem: ende ic menichuoudichden

3

Daer om sal die here syon vertroesten ende hi sal alle haer vallen vertroesten Ende hi sal haer wildernissen setten als weeldicheden. ende haer enicheit als des heren boemgaert. Blijscap ende vroude salmen in haer vinden: werc van danc ende stemme van loue.

4

Verstaet te mij mijn volc ende mijn gheslachte hoert mi. want een wet sal van mi wtcomen: ende mijn vonnisse sal rusten inder volke licht

5

Mijn gerechtige is bi mi: mijn behouder is wtcomen: ende mijn arme sulle den volke vonnissen. Mi sullen die eylanden ontbeiden: ende sij sullen mijnen arme gedoghen.

6

Heft op inden hemel v oghen: ende siet onder die aerde beneden. Want die hemelen sullen smelten als roec: ende die aerde sel worden verteert als een cleet: ende die ghene dier op wonen. sullen veruaren als dese dinghen. Mer mijn salicheit sal inden eweliken wesen: ende mine gerechticheit en sal niet ghebreken.

7

Hoert mij die dat gherechte weet: mijn volc mine wet is in haer herte. En wilt niet ontsien der menschen lachter: ende en ontsiet haer blasphemie niet.

8

Want ghelike enen clede salse die worme eten: ende als wolle salse die motte eten ende verteren Mer mijne salicheit sal inden eweliken wesen: ende mine gherechticheit in gheslachte ende gheslachte

9

Stant op stant op:: doet aen starcheit des heren

[p. *397]

arme. Stant op als inden ouden daghen: inden gheslachte der werelden. En sloechstu den houaerdighen niet ende en wondestu den drake niet?

10

En verdroeghestu die zee niet: dat water van den anxteliken afgronde? Die settes die diepheit der zee tenen weghe: omdat die verloste ouerliden souden.

11

Ende nv die verlost zijn vanden heren si sullen wederkeren: ende sij sullen comen in syon louende: ende ewelike blijscap sal wesen op haer hoefden. Si sullen vroude ende blijscap houden: rouwe ende versuchten sal vlien.

12

Ic ic selue sal v vertroesten. Wie bistu dattu di ontsien sultste van enen sterueliken mensche van eens menschen sone: Die verdroghen sal als hoey?

13

Ende du heueste vergheten dijns heren dijns sceppers. die die hemel wtghespreit heeft ende die aerde ghefondeert heeft: ende du heeftste eenpaerlijc alden dach ontsien vanden aensicht sijns torens die di gequelt hadde: ende bereet hadde om te verliesen. Waer is nv die gramscap des gheens die quelde?

14

Hi sal saen comen die gaende is om te ondoen: ende hi en sal niet doot verslaen totter verderffenisse: noch sijn broot en sal niet ghebreken.

15

want ic bin die here dijn god die de zee verstorme ende haer baren heffe op: die here vanden scaren is minen name.

16

Ic hebbe mijn woerde gheset in dijnen mont: ende in die scaduwe mijnre hant heb ic di bedect: om dattu die hemel planten sults ende die aerde fonderen: ende dattu tot syon sultste seggen: du biste mijn volc..

17

worde verheuen: worde verheuen: stant op iherusalem: die ghedroncken hebste van des heren hant den nap van sijnre gramscap. Totten gronde vanden nappe des slaeps hebstune ghedroncken: ende du hebsten wtghedroncken totten droessenen.

18

Niemant en is die iherusalem onderhout van alle haren kinderen die si ghewonnen heeft: ende nyemant en is die haer hant begrijpt van allen den kinderen die sij op gheuoet heeft.

19

Twe dinghen sijn die di ieghen comen sijn. wie sal op di bedroeft worden?. Woestheit ende bedroeftheit ende hongher ende dat zwaert: wie sal di vertroesten?

20

Dine kinderen sijn daer buyten gheworpen: si sliepen int hoeft van alle weghen als een slaepmuys in een stricke: vol van des heren onwaerdicheden. vanden berispen mijns gods.

21

Hier bi ghi armoedighe ende niet droncken van wijne. hoer dit.

22

Dit seit dijn here dijn god die heerscappie bouen di heeft. die vacht voer sijn volc. Sich ic hebbe genomen van dijnre hant den nap des slaeps: den gront des naps mijnre onwaerdicheit. Ic en sallen niet toe brenghen dattune voert meer drincken sultste.

23

Ende ic sal dien gheuen inder gheenre hant die di veroetmoedicht hebben ende die dijnre zielen seiden nicke neder dat wij ouerliden: ende du hebste gheset alle die aerde dinen lichaem: ende als enen wech den ghenen dier ouerliden