Bible in duytsche (Delftse bijbel 1477)

§ Ca .xlix.

1

HOert ghi eylande: ende die volke van verren verstaet. Die here riep mij vanden buke: wt mijnre moeder lichaem is hi ghedacht mijns namen.

2

Hi heeft gheset mijnen mont als een scarp zwaert: in die scaduwe sijnre hant heeft hi mij bedect: hi heeft mi geset als een wtuercoren ghescutte. Hij verbarch mi in sijnen koker:

3

ende hij seide mi. Du biste mijn knecht israhel: want in di sal ic glorieren.

4

Ic seide. Ic hebbe om niet ghearbeit: sonder saken ende ydelijc heb ic mijne starcheit verslete. Daer om is mijn vonnisse mitten here: ende mijn werc mit minen gode.

5

Ende nv dit seit die here die mi vten lichaem geformeert heeft tot enen knecht tot sijnen behoef: om dat ic iacob weder te hem brenghen sal: ende israhel sal worden vergadert tot hem Ende ic bin geglorificeert in des heren oghen: ende mijn god is mi ghemaect mine starcheit.

6

Ende hi seide. Hets luttel dattu mijn knecht biste om te verwecken iacobs gheslachten: ende om te bekerene die druesemen van israhel. Sich ic hebbe dij ghegheuen in een licht der heydenen: dattu mine salicheit wesen sultste totten eynde der werelt

7

Dit seit die here die verlossere van israhel. sijn heilighe. te versmadeliker zielen ende ten veronwaerdenden luden ten knecht vanden heren. Die coninghen sullen sien ende die princen sullen mede opstaen: ende si sullen aenbeden om den here want hi ghetrouwe is: ende den heylighen van israhel di v wtuercoren heeft.

8

Dit seit die here. Inden bequamen tiden gehoerde ic dij: ende inden daghe der salicheit heb ic di gheholpen. Ende ic behielt di ende ic gaf di in des volcs belofte. dattu dat lant verwecken soutste ende dattu besitten soudes die ghescheiden erueachticheden:

9

dattu seggen soudes den ghenen die gheuanghen sijt gaet vte: ende den ghenen die in donckerheden sijn wort verlicht. Op den weghen sullen si worden gheuoet: ende in allen gheslachten sullen wesen hare weiden.

10

Si en sullen ne gheen hongher hebben noch dorstich wesen: ende die hette ende die sonne en salse niet slaen: want haer ontfermere salse regeeren. ende hi salse drincken ten fonteynen van den wateren.

11

Ende ic sal legghen alle mijn berghen in weghe: ende mijn manpade sullen worden verheuen.

12

Siet dese sullen van verren comen: ende sich die van noerden ende vander zee: ende dese vanden zudenen lande.

13

Gij hemele looft ende die aerde sal verbliden: Ghi berghe iubileert lof: want die here heeft sijn volc vertroest. ende sijnre armer sal hi ontfermen.

14

Ende syon seide. Die here heeft mi ghelaten. ende die here heeft mijns vergheten.

15

En mach een wijf haers kints niet vergeten: dat si niet en onferme des kints

[p. *395]

haers buycs? Ende al ist dat sijts vergheet: nochtan en sal ic dijns niet vergheten.

16

Sich in minen handen heb ic di bescreuen: dine mure sijn altoes voer mijnen oghen.

17

Dijne stichters sijn comen di destruerende ende scheidende sullen si van di wtgaen.

18

Heffe op al om dijn oghen ende sich: alle dese sijn vergadert: si sijn di comen. Leue ic seit die here god: want niet alleen desen sultstu ghecleet werden als myt eenre vercierheit: ende du sultste om di hanghen als een bruut.

19

Want dine wildernissen ende dine enicheden ende dat lant dijns vals sullen nv nauwe wesen mits dien dier in wonen sullen: ende die di verslinden. sullen verre worden veriaghet.

20

Noch sullen si segghen in dijnen oren die kindere dijnre ondrachticheit Die stat is mi te nauwe: maect mij pleyne dat icker in wonen mach.

21

Ende du sultste segghen in dijn herte. Wie heeft mi dese gewonnen? Ic bin ondrachtich ende niet ghebarende ouergheuoert ende gheuanghen: ende wie heeft dese opgheuoet? Ic bin beroeft van allen: ende waer waren dese?

22

Dit seit die here god. Siet ic sal heffen op mijn hant ten heydenen: ende ten volke mijn teyken Ende sij sullen brenghen die kindere in haren armen: ende si sullen dijn dochtere draghen op hare scouderen.

23

Ende die coninghen sullen wesen dijne voesteren: ende die coninghinnen dine voetsteren moeder. Si sullen di aenbeden mit nederhanghenden aensichte in die aerde: ende sullen lecken dat ghemul van dijnen voeten. Ende du sultste weten dat ic die here bin: op den welken si niet bescaemt werden en sullen dien ontbeiden.

24

En sal niet werden ghenomen vanden starcken die proye: of dat gheuaen is vanden vromen en sal niet moghen behouden wesen?

25

Want dit seit die here. Iaet oec ende die gheuangenisse sal worden ghenomen vanden starcken: ende dat wech ghedraghen was vanden vromen sal worden behouden. Mer die ghene die dij veroerdelen. sal ic oerdelen: ende dine kindere sal ic behouden.

26

Ic sal dijne vianden spisen mit haren vleysche: ende si sullen droncken worden van haren bluede als van moste. Ende alle vleysch sal weten dat ic bin die here behoudende di: ende dijn verlossere starcke iacob.