Bible in duytsche (Delftse bijbel 1477)

§ Ca .xlvij

1

GAnc neder: sittet inden

[p. *392]

ghemulle maghet dochter van babilonien: sitte op die aerde. En is gheen zetel der dochter vanden caldeeuschen: want du en sultste voertmeer niet worden gheheten socht ende teder.

2

Neem enen molentsteen ende male meel: ondecke dijn vuylheit. Ondecke dijn scouder: bloet dijne knyen: ganc ouer die riuier.

3

Dine scamelheit sal geopenbaert worden: ende men sal dijne lachter sien. Ic sal wrake nemen: ende ne gheen mensche en sal mij moghen wederstaen.

4

Onse verlossere die here vanden scaren is sijn name die heylighe van israhel.

5

Sitte ende zwijch ende ganc in donckerheden dochter vanden caldeeuschen: want du en sultste voertmeer niet werden gheheten vrouwe vanden riken.

6

Ic bin gram op mijn volc: ic besmettede mijne erfachticheit. Ende ic gafse in dijn hant: du en dedeste hem ne ghene ontfermherticheden. Opten ouden mensche verzwaerdste dijn ioc sere:

7

ende seitste Ewelijc sal ic vrouwe wesen. Du en leids dese dinghen op dijn herte niet: noch en biste ghedacht dijns achterste.

8

Ende nv hoert dese weeldighe wonende betrouwelijc: die segs in dijn herte ic bint: ende sonder mi en is gheen ander. Ic en sal niet sitten weduwe: ende ic en sal niet weten ondrachticheit

9

Dese twee sullen di haestelijc comen in enen daghe: ondrachticheit ende weduwelicheit. Alle dese dingen sullen op di comen om die menichte. van dijnen quaden werken: ende om die anxtelike hertheit dijnre toueraers.

10

Ende du hadtste betrouwen in dine quaetheit: en du seitste. Niemant en is die mij siet. Dine wijsheit ende dijne conste dese heeft di bedrogen. Ende du hebtste gheseit in dijn herte. Ic bin: ende sonder mi en is gheen ander.

11

Op dij sal quaet comen. ende du en sultste sijn beghin niet weten: ende op di sal vallen ellendicheit die du niet en sultste moghen of ghesuueren. Op di sal haestelijc comen keytiuicheit die du niet en weetste.

12

Stant mit dijnen touenaren ende mitter menichten van dinen quaden waersaghers inden welken du gearbeit hebtste van dijnre ioncheit: ofte si di yet machschien moghen vorderen. of dattuus moges worden te starcker

13

Du biste amachtich worden in die menichte van dijnen raden. Die astrenomien des hemels sullen staen ende behouden dij. die die sterren mercten ende die maenden telden: dat sij wt dien boetscappen souden van die dij toe te comen waren.

14

Siet si sijn ghemaect als stoppele: dat vyer heeftse verbrant Ende si en sullen haer zielen niet verlossen vander vlammen hant: en sijn gheen colen daer si mede verwarmen mogen. noch brant daer si aen sitten moghen

15

Aldus sijn sij dij ghemaect: alle die gene daer du in ghearbeit hebste. Dinen comenscapers van dijnre ioncheit: elc heuet in sijnen wege gedoelt nyemant en is die di behouden mach