Bible in duytsche (Delftse bijbel 1477)

§ Capittel .xlvi.

1

BEl is te broken nabo is ontween ghewreuen: haer beelden sijn gemaect den beesten ende den paerden: uwe lasten sijn mij mit zwaren laste totter moetheit te smolten:

2

ende te gader te broken. Ende si en mochten niet behouden den ghenen diese droech: ende haer ziele sal in geuanghenisse gaen.

3

Hoert mi iacobs huys: ende al dat ouerblijf des huys van israhel. Die ghedraghen wort van minen buke: ende voert gebracht wort van mijnre vroulicheit.

4

Totter outheit sal ic selue wesen: ende totter grawicheit sal ic v dragen. Ic hebt gemaect ende ic salt dragen: ende ic salt dragen ende salt behouden

5

Wie hebdi mi gelike gemaect ende ieghen wien gheacht: ende ieghen wien gherekent ende wieu hebdi mi ghelike gemict?

6

Die voert brenghet dat gout wt den sackelkijn. ende dat siluer weghet mit eenre wagen Hoerende enen goutsmit dat hi enen god maken sal: ende si vallenre voer ende aenbeden.

7

Si draghen dien afgod op haer scouderen draghende: ende lettende in sijn stat. Eude hi sal daer staen: ende van sijnre stat niet verporret worden. Mer oec als si aen hem roepen sullen hi en sals niet hoeren: hi en salse niet onthouden vanden vernoy.

8

ghedenct dit ende ghi sult bescaemt worden:: ghi ouerdadighe keert weder ter herten:

9

gedenct der eerster werelt want ic bin god ende voertmeer en is gheen god: ende mijns ghelike en is niet

10

boetscappende vanden beghinne dat alre laetste: ende vanden beghinne dat noch niet geschiet en was. Seggende mijn raet sal staen: ende al minen wille sal gheschien.

11

Roepende van oesten den gherechtighen: ende van verren landen den man mijns willen. Ende ic hebt ghesproken ende ic sal dat toebrengen. ic hebben ghescepen ende ic sal dat doen

12

Hoert mij ghi harde van herten: die verre sijt vander gherechticheit.

13

Ic dede bi mijnen gherechticheit: si en sal niet veruerren: ende mijn salicheit en sal niet letten: ic sal gheuen in syon salicheit: ende in israhel mijn glorie