Bible in duytsche (Delftse bijbel 1477)

§ Capit .xlv.

1

DIt seit die here mijnen gheconsacreerden coninc cyro wies rechter hant ic begrepen hebbe. dat ic voer sijn aensicht tonderdoen sal die heydene: ende ic sal der coninge rugghe omme keren. Ende ic sal voer hem opdoen die doren ende die poorten en sullen niet ghesloten worden.

2

Ic sal voer dij gaen: ende die gloriose der werelt sal ic vernederen. Die metalen poorten sal it otween breken: ende die yseren grendelen sal ic mede breken.

3

Ende ic sal

[p. *390]

di gheuen die verborghen tresoren ende die verholentheden der heymelijcheden: om dattu weten sultste dat ic die here bin. die dinen name roepe god van isarahel:

4

om mijnen knecht iacob ende israhel mijnen wtuercoren. Ende ic heb di gheropen bi dinen name: ic heb di ghelike ghemaect: ende du en hebste mi niet bekent.

5

Ic bin die here: ende gheen ander. Buyten mij en is gheen god. Ic heb dij begort ende du en hebste mij niet bekent:

6

op dat sij weten sullen die vander sonnen opganghe sijn. ende die van horen onderganghe sijn dat sonder mi ne gheen god en is. Ic bin die here: ende ten is gheen ander:

7

formerende dat licht ende sceppende die donckerheden: makende den vrede ende sceppende dat quade. Ic die here die alle dese dinghen bin doende.

8

Douwet ghij hemele van bouen ende die wolken regenen den gherechtighen: die aerde werde ondaen ende sij groye enen behouderere: ende die gherechticheit verriset mede. Ic die here hebben ghescepen.

9

Wee die wederseit sijnen makere: scarf vanden lande van samijs. En seit die potaerde haren pottemaker niet. wat maectstu: ende v werc is sonder hande?

10

Wee die den vader seit wat wintstu ende den wijue wat ghebaertstu?

11

Dit seit die here die heylighe van israhel: sijn scepper. Draghet mi dat toe te comen is: op mine kinderen ende op die werke mijnre hande ghebiet mi.

12

Ic hebbe die aerde gemaect: ende ic sciep den mensche daer op. Ic ende mijne handen hebben den hemel wtghespreit: ende ic hebbe alle horen riderscap beuolen.

13

Ic hebben verwect ter gherechticheit: ende ic sal alle sijne weghe beleden. Hi sal stichten mine steden: ende hij sal mine geuangenisse laten gaen niet in loue noch in giften: seit die here vanden scaren.

14

Dit seit die here god. Die arbeit van egipten ende die comanscap van ethiophien ende van saba die hoghe mannen sullen tot di ouercomen ende sullen dijn wesen: si sullen na dij wandelen. Si sullen ghebonden gaen in hantysere: ende si sullen di aenbeden ende di bidden. Alleen is god in di: ende sonder di en is gheen god.

15

Waerlijc bistu die verborghen god: behoudere god van israhel.

16

Si worden confuus ende scaemden hem alle te gadere: der versierres der dolingen ghingen wech in scanden.

17

Israhel wort behouden in den here mit eweliker salicheit. Ghine sult niet werden geschent ende v niet scamen tot inder werlt des werlts:

18

want dit seit die here die hemel sceppende. Hi is god formerende die aerde ende die makende: hi is haer makere. Hi en heeft die aerde om ydelheit niet ghescepen: mer om datmenre op wonen sal so heeft hijse gheformeert. Ic bin die here: ende hier en is gheen ander.

19

Ic en heb inder heymelicheit niet ghesproken: inder doncker stat der aerden Ic en heb niet gheseit iacobs sade tevergeefs: soect m. Ic bin die here sprekende de gherechticheit: boetscappende rechte dingen.

20

Wert vergadert ende coemt: ende coemt voert te gadere die behouden sijt vanden heydenen. Sij en

[p. *391]

wistens niet die opheffen dat teyken haers afgodes: ende si bidden enen god die niet en behout.

21

Boetscapt ende coemt: ende hebt raet te gader. Wie heeft dit doen horen? Vanden beghinne van dier tijt heb ic dat voerseit En bin ic dan niet die here: ende voert en is gheen god sonder mi? Gherechtich god ende behoudende so en is niet sonder mi.

22

Wert bekeert te mij ende ghi sult behouden wesen ghi alle eynden van aertrijc: want ic bin god ende hier en is gheen ander sonder mij.

23

In mij seluen heb ic gezworen wt mijnen monde sal comen een woert der gherechticheit. ende en sal niet wederkeren: want mi sal gheboecht worden alle knyen: ende mij sal alle tonghe zweren.

25

Daer om sullense inden here segghen. Mijn sijn die gherechticheden ende die heerscappie. Si sullen tot hem comen: ende werden confuus alle die ieghen hem steken.

26

Inden here sal worden gherecht ghemaect ende gheloeft alle dat saet van israhel.