Bible in duytsche (Delftse bijbel 1477)

§ Ca .xliiij

1

ENde nv hoer iacob mijn knecht ende israhel dien ic vercoren hebbe.

2

Dit seit die here di makende ende formerende: wt den lichaem dijn helpere. En wille niet ontsien mijn knecht iacob: ende die alre gherechtichste dien ic vercoren heb.

3

Want ic sal water wtstortten opten dorstighen: ende riuieren op die droecheit. Ic sal mijnen gheest wtstortten op dijn saet: ende mijn benedictie op dijn gheslachte:

4

ende si sullen groeyen onder die crude als wilghen neuen lopende wateren.

5

Dese sal segghen ic bin des heren: ende die sal aenropen in iacobs name. Ende dese sal scriuen mit sijnre hant den here: ende hi sal ghelike worden inden name van israhel.

6

Dit seit die here die coninc vanisrahel ende sijn verlossere: die here van den scaren. Ic bin die eerste ic bin die leste: ende sonder mi en is gheen god

7

Wie is mijns ghelike? Hi sal roepen ende boetscappen: ende ontbinde mi die ordinancie. Van dier tijt dat ic dat oude volc settede: dat toe te comen is. ende die dinghen die te gheschien sijn sullen haer boetscappen

8

en wilt niet ontsien: noch en wert niet ghestoert. Van dier tijt heb ict di doen horen: ende gheboetscapt. Ghi sijts mijn oerconden. Is enich god sonder mi. ende enich formeerre dien ic niet en kenne?

9

Die makers der afgode sijn alle niet: ende haer alre geminste en sullen hem niet vorderen. Si sijn haer oerconden. dat si niet en sien noch niet en verstaen: dat si gheconfondeert moeten worden.

10

Wie formeerde enen afgod: ende goet een beelde te niet oerbaerlijc

11

Siet si alle die deelachtich sijn des afgods sullen worden geschent Want het sijn smeden vten menschen Als si comen sullen: so sullen si alle staen ende hem veruaren: ende si sullen worden gheschent te gadere.

12

Die smit van ysere hi wracht mitter vilen: ende in die colen ende mitten smedehameren soe formeerde hi dien: hij wrachte inden arme sijnre starcheit. Hi sal hongher hebben ende amachtich worden: hi en sal gheen water drincken ende hij sal moede worden.

13

Die werckman van hout werc leide langhes die regule hi formeerden mit beetelen. Hij makede inden winckel haec: ende inden passer so draeyde hine: ende hi maecte eens mans beelde als enen schonen man die woent in een huys

14

Die meester hyeu of cederbome: hij nam vueren houte ende eyken die ghestaen hadden onder die houte vanden woude. Hi plante den pijnboem dien die reghen voede:

15

ende een deel daer of is ghemaect den menschen in vyer. Hi nam van dien bomen ende hi worter mede verwarmt ende hi ontstac ende biec broot daer mede: mer datter ouerbleef maecte hij enen god ende hi aenbeden: ende hi maecte een beelde ende hij nijghede ende

[p. *389]

knyelde voer dien.

16

Die middewaert van dien afgod verbrande hi mitten vyer: vander middewaert van hem soet hi vleysch. ende attet: hij soet pulment ende werter sat of: ende hi is verwarmt ende hi seide. Ay ic bin verwarmt: ic sach een vyer.

17

Mer dat ander van dien houte. maecte hi enen god ende tenen afgode tsijnen behoef. Men valter voer neder: ende aenbeten ende hi bid seggende Verlosse mi: want du biste mijn god

18

Si en wistens niet noch si en verstondens niet want si hebbent vergheten dat haer oghen niet sien en moghen: ende dat si niet verstaen en souden mit haerre herten.

19

Si en ghedencken niet in haren ghedachten: noch en bekennen noch en gheuoelen dat si segghen mogen. Die een helfte vanden houte heb ic verbrant mitten vyer: ende ic heb op zijn colen broet gebacke. Ende vleysch gesoden ende hebt ghegheten: ende sal ic van den anderen datter ghebleuen is een beelde maken? Sal ic voer sijn bloc nederuallen?

20

Een deel vanden houte is assche. Dat sotte herte heeft dat aenghebeden: ende en heeft sijne ziele niet verlost: noch segghen machschien tis loghen in mijne rechterhant.

21

Ghedenct deser iacob ende israhel: want du biste mijn knecht. Ic formeerde di: du biste mijn knecht. Israhel du en sultste mijns niet vergheten.

22

Ic hebbe dijne ongherechticheden ofghedaen als ene wolke: ende dijn sonden als enen neuel Keer weder te mij: want ic hebbe dij verlost.

23

Loeft ghi hemelen want die here heeft onfermherticheit gedaen: vervroudet die eynden der aerden. Ghij berghe gheluut lof: dat wout ende al sijn hout. Want die here heeft iacob verlost: ende israhel sal worden gheeert

24

Dit seit die here dijn verlossere: ende dijn formerere wt den lichaem. Ic bin die here alle dinghen makende: sijn hemelen wtspreidende. Alleen dat aertrijc vast settende ende nyemant mit mi

25

Te nyete makende der waersaghers teykenen: ende die touenaers in verwoetheden verkerende. Die wijse achterwaert omkerende ende haer conste sot makende.

26

Verweckende sijns knechts woert: veruollende sijnre boden raet. Die iherusalem segghe men sal in di wonen: ende den steden van iuda. ghi sult werden ghesticht: ende haer woestinen sal ic verwecken.

27

Die der diepheit segghe werde bedroeft: ende ic sal dijn riuieren droech maken.

28

Die cyro segge du biste mijn herde: ende du sultste alle mijn wille veruollen. Die tot iherusalem segghe du sultste ghesticht worden: ende den tempel du sultste ghefondeert worden.