Bible in duytsche (Delftse bijbel 1477)

§ Ca .xliij

1

ENde nv seit dit die here di sceppende iacob: ende di formerende israhel. En wilt niet ontsien want ic heb di verlost: ende ic heb di gheropen bij dijnen name. Du biste mijn.

2

Als du doer die wateren liden sultste soe sal ic mit di wesen: ende die riuieren en sullen dij niet ouerlopen. Altstu wandelen sultste in den vyere so en sultstu niet verbernen: ende die vlamme en sal in dij niet bernen:

3

want ic bin die here dijn god heilighe israhel dijn behouder. Ic heb egipten dijn guedertierenheit ghegheuen: ende ethiophien ende saba ouer di.

4

Van dier tijt dattu eerlijc geworden biste in mijnen oghen ende glorioes: so heb ic dij ghemint. Ende ic sal die menschen ouer dij gheuen: ende die volke ouer dijne ziele.

5

Ende wil niet ontsien: want ic bin mitti. Ic sal dijn saet bren-

[p. *387]

ghen van orienten: ende sal di van westen vergaderen.

6

Ic sal den noerden segghen gheef: ende den zuden. en wils niet verbieden. Brenghet mijne sonen van verren: ende mijn dochteren vanden eynden der werelt.

7

Ende elken die mijnen name aenroept. ic hebben ghescepen in mijnre glorien: ic hebben gheformeert ende ic hebben ghemaect.

8

Leide daer buyten. dat blinde volc ende dat oghen heeft. dat doue volc. ende hem sijn sijn oren.

9

Alle heyden sijn te gader vergadert: ende die gheslachten sijn vergadert. Wie van v sal dit boetscappen: ende die die eerste sijn wie salt v doen horen? Sij gheuen haer oerconden ende si worden gherechtich ghemaect: ende si horent ende segghent.

10

Waerlijc sidi mijn oerconden seit die here: ende mijn knechte die ic wtuercoren hebbe: dat ghi weten sult ende mi ghelouen. ende dat ghi verstaen sult dat ict selue bin. Voer mi en is gheen god geformeert: ende na mij en sal gheen wesen.

11

Ic bin ic bin die here: ende sonder mij en is gheen behouder.

12

Ic hebbe geboetscapt ende ic hebbe behouden: ic hebt doen horen: ende in v luden en was gheen vreemde. Ghi sijt mijne oerconde seit die here: ende ic god.

13

Ende vanden beghinne ic selue bint: ende nyemant en is die van mijnre hant verlossen mach Ende ic sal werken: ende wie sal dat auerecht keren?

14

Dit seit die here ende v verlosser die heylighe van israhel. Om v sende ic vte in babilonien: ende ic hebbe ter neder ghetoghen alle die grendelen: ende die caldeeusche die verblidende sijn in haren handen.

15

Ic die here uwe heylich: uwe coninc: sceppende israhel

16

Dit seit die here die in die zee wech ghegheuen heeft: ende inden schietenden wateren manpat.

17

Die wtbrocht den waghen ende dat paert: die scare ende den vromen. Sie sliepen alle te gader ende si en sullen niet weder opstaen: sij sijn vertreden als vlas: ende sij sijn gheblucscht.

18

Ende gedenct der eerster niet. ende die oude en aenscouwet niet.

19

Siet ic make nyewe dinghen. ende nv sullen sij risen: ende ghi sultse oec bekennen. Ic sal inder woestinen wech legghen: ende inden lande sonder wech riuieren.

20

Ende die beeeste des ackers sal mi louen. die draken ende die struzen: want ic heb inder woestinen ghegheuen wateren. riuieren int lant dat sonder wech is omdat ic mijnen volke drincken gheuen soude minen wtuercoren.

21

Dit volc heb ic te mijnre behoef gheformeert: het sal mijnen lof vertellen.

22

Du en hebtste mij nyet aengheroepen yacob: noch en hebtste in mij ghearbeit israhel.

23

Du en hebtste ne ghenen weder gheoffert te holocauste: ende mit dijnen victimen en hebstu mi niet gheeert. Ic en dede di niet dienen in offerhanden: noch ic en gaf di genen arbeit inden wieroeck.

24

Du en cochste mi niet mit gelde calamum: ende du en versades mij niet mitten ruete van dinen victimen Mer nochtan hebstu mi doen dienen in dijnen sonden: du hebste mij arbeit ghegheuen in dijnen ongherechticheden.

25

Ic bint. ic bint selue. die ofdoe v ongherechticheden om mi seluen: ende ic en sal dijnre sonden niet ghedencken.

26

Bren-

[p. *388]

ghet mi weder in dijn ghedencken ende worden wi te gader gheoerdelt: vertelle wattu heues dattu gherechtich wesen moges.

27

Dijn eerste vader sondichde: ende dijn bedieders deden ouerdaet teghens mi.

28

Ende ic besmette die heilighe princen: ic gaf iacob te verderfnissen: ende israhel in blasphemien