Bible in duytsche (Delftse bijbel 1477)

§ Capittel .xli.

1

DIe eylanden zwighen te mij: ende die heyden verwandelen hare starcheit Si comen voert ende spreken dan: naken wi te gader den vonnisse.

2

Wie verwecte van oesten den gherechtighen. Ende wie riepen dat hi hem volghen soude? Hi sal in sijnen aenscouwen die hei-

[p. *384]

den gheuen: ende hi sal die coninghe behouden. Hi salse gheuen als ghemul te sijnen zwaerde: als een stoppel begrepen vanden winde sal hijse gheuen te sijnen boghe.

3

Hi salse persequeren: hi sal ouerliden in paeyse: ende die pat en sal in sijnen voeten niet openbaren

4

Wie heeft dit gewracht ende ghedaen. ropende te hem die gheslachten vanden beghinne? Ic die here: die eerste ende die leste bin ic.

5

Die eylande saghen ende ontsaghen hem: die eynden der werlt verwonderden: sij ghenaecten. ende quamenre toe.

6

Yghelijc sal sijnen naesten helpen: ende sal sijnen brueder segghen werde vrome.

7

Die yser smit sal ghestarcken dien slaende hem mitten hamer die doe ter tijt smede segghende: ic smede te hoep hets guet: hi maecten vast mit naghelen dat hi niet verporren en soude.

8

Ende du israhel mijn knecht: iacob dien ic vercoes abrahams mijns vrients saet.

9

inden welken ic di begreep Ic hebbe di gheropen vanden eynden der werelt ende van horen vortsten heb ic di gheropen: ende ic seide di. Du biste mijn knecht: ic heb di vercoren ende en heb di niet verworpen.

10

En ontsich di niet want ic bin mit v: en keer dij niet of: want ic dijn god bin. Ic heb dij ghestarct ende heb dij gheholpen: ende di heeft ontfaen die rechte hant mijns gherechts.

11

Sich ale die gene die vechten ieghen di sullen worden confuus ende hem scamen. Si sullen wesen als ofte sij niet en waren: ende die mannen die dij wedersegghen sullen veruaren.

12

Du sultste haer soeken ende niet vinden die manne die ieghen di steken ende si sullen sijn als ofte si niet en waren ende als dat verderuen eens mans die ieghen di vecht:

13

want ic bin die here dijn god begripende dijn hant ende segghende di. En ontsich di niet: want ic heb di gheholpen

14

En wil niet ontsien worm iacob: die doot zijt wt israhel. Ic heb di gheholpen seit die here: ende ic bin dijn verlosser die heilighe van israhel.

15

Ic heb di gheset als enen nyewen dorschenden waghen: die saghende becken heeft. Du sultste die bergen dorsschen ende ontween breken: ende du sultste die houelen als ghemul maken

16

Ende du sultste wannen ende die wint salse begripen ende stroeyense: ende du sultste verblijden inden here. ende werden vervroudet inden heylighen van israkel

17

Die mate ende die arme soeken wateren ende si en sijn niet: haer tonghe is verdroghet van dorste. Ic die here salse ghehoren: god van israhel en salse niet laten.

18

Ic sal openen inden hoghen berghen riuieren: ende in midden den velden fonteynen. Ic sal die woestine setten in viuers van wateren: ende dat lant sonder wech in beken van wateren.

19

Ic sal gheuen inder wildernissen den cederboem: ende den doren ende mirtun ende hout der olyuen. Ic sal setten inder woestinen den vueren boem ende den vlmun ende den boschboem te gader.

20

dat sijt sien sullen ende weten ende herpensen ende verstaen te gader: want des heren hant heuet gedaen: dats die heylige van israhel heuet dat gescepen

21

Doet bi wesen v vonnisse seit die here

[p. *385]

Brenghet voert ofte ghi machschien yet hebt seit die coninc van iacob.

22

Si comen voert: ende boetscappen ons sowat toe te comen is. Die eerste die geweest hebben gheboetscapt: ende wi sullen onse herte setten om v te oeffenen ende wi sullen weten. Haer achterste ende dat toe tecomen is segt ons Boetscapt

23

dat toecomen is hier namals ende wij sullen weten dat ghi goden sijt. Ofte ghij oec moget so duet wel ofte qualijc ende spreken wi ende sien wi te gader.

24

Siet ghi siet van nyete: ende v werc wt dien dat niet is. Hi is te veronwaerden die v vercoren heeft.

25

Ic hebben verwect vanden noerden: ende hi sal comen vander sonnen opgange. Hi heeft mijnen name gheropen: ende hi sal toebrenghen dat meestercap als potaerde: ende als een aerden pottemaker die de potaerde treet

26

Wie boetscapt vanden beghinne dat wi mogen weten: ende vanden beghinne dat wi moghen segghen du biste gerecht Niemant en is boetscappende noch voersegghende: noch horende uwe redenen.

27

Die eerste sal segghen tot syon. Siet ic bin hier: ende ic sal iherusalem enen ewanghelist gheuen.

28

Ende ic sach. Ende nyeman en was van desen die raet aenghinc: ende die als hi ghevraghet was enich woert antwoerde.

29

Siet si sijn alle ongherechtich: ende haer werken sijn ydel: wint ende ydelheit sijn haer beelden