Bible in duytsche (Delftse bijbel 1477)

§ Capittel .xl.

1

WErt vertroest wert vertroest. mijn volc: seit die here v god

2

Spreect ter herten van iherusalem ende roeptser toe: want haer quaetheit is veruolt. haer ongherechticheit is haer verlaten Si heeft ontfaen van des heren hant dubbel dinghen: ouer al haer sonden.

3

Stemme die roepes inder wildernissen. Bereit des heren wech: maect recht des heren ons gods toepaden inder enicheden.

4

Alle valeye sullen werden verheuen. ende alle berge ende houel zullen worden vernedert: ende alle velden sullen wesen in verrechten: ende die ruwe in slechten weghen.

5

Ende des heren glorie sal worden gheopenbaert: ende alle vleische sal te gader sien dat des heren mont gesproken heeft

6

Stemme des segghers Roept. Ende ic seide. Wat sal ic roepen? Alle vleysch is hoey: ende alle sijn glorie als die blome des ackers.

7

Dat hoy wort verdroget ende die blome viel want des heren gheest blies in hem. Waerlijc so is dat volc hoy.

8

Dat hoy wort verdroghet ende die bloem viel: mer des heren woert geduert ewelijc

9

Ganc op du op enen hogen berch die predicste syon: mer verheffe in starcheden dijn stemme die predicste iherusalem. Verheffe op: ende en wilt niet ontsien. Seg den steden van iuda: siet uwen god.

10

Siet de here god sal comen in starcheden: ende sijn arm sal die heerscappie hebben. Siet sijnen loen mit hem: ende sijn werc voer hem.

11

Als een herde sal hi sijn cudde voeden: in sijnen arme sal hi die lammer vergaderen: ende hi salse in sijnen scoot op heffen: die drachtige sal hi draghen.

12

Wie heeft mitten bodem der hant die watere ghemeten: ende die hemele mitter palme gheweghen? Wie heeft mit drie vingheren ghehanghen die hope vander aerden: ende heeft gheweghen in ghewichte die berge ende die houelen in eenre wage?

13

Wie heeft des heren gheest geholpen.

[p. *383]

of wie was sijn raedsman ende heeft hem ghetoghet?

14

Mit wien hadde hi raet ende wie leerde hem den wech der gherechticheit. ende leerde hem const: ende togede hem die wech der wijsheit?

15

Sich die heidene sijn als een dropel eens emmers: ende si sijn gheacht als clinckender tonghen eenre waghe. Siet die eylanden sijn als een cleyn ghemullekijn.

16

ende die libanus en sal niet genoech wesen om te ontsteken: ende sijn beesten en sullen niet ghenoech wesen ten holocauste.

17

Alle die lude als ofte si niet en sijn. also sijn si voer hem. ende alse niet ende een holheit sijn si hem geacht.

18

Wien hebdi gode ghelijc ghemaect: ofte wat beelde suldi hem maken?

19

En heeft een smit niet gesmedet een beelde: ofte en sal een goutsmit dien niet figureren. ende een siluersmit mit silueren platen?

20

Die wise werckman hi coes een starck hout dat niet verrotten en mach: hij sochte hoe hi gesetten mach die beelde dat si niet verport en worde.

21

En weettijs niet? En hebdijs niet ghehoert? Ende en ist v niet geboetscapt vanden beghinne? En hebdi niet verstaen die fondamenten der aerden?

22

Die sittet opten omringhe der werlt: ende diere op wonen sijn als spelthanen. Die die hemelen wtspreedet als niet: ende hij spreetse wt als een woninge in te wonen.

23

Die gheeft die ondersokers der verholentheit als of sij niet en sijn: die rechters vanden lande heeft hi als ydelheit ghemaect.

24

Ende want haer tronc inder aerden niet en was gheplant noch ghesaeyt noch ghewortelt. So waeyden haestelijc in hem ende sij verdrogheden: gedrusche salse wech doen als stoppele.

25

Ende wien hebdi mij ghelijc gemaect ende ieghen wien gheacht seit die heylighe?

26

Heft op uwe oghen inden hoghen: ende besiet wie dese dinghen ghescapen heeft. Die wtbrenghet in ghetale haerre ridderscap: ende hi roeptse alle bi namen. Mits der menichten sijn starcheit ende sijnre vromicheit ende sijnre cracht: so en bleeffer ene niet ouer.

27

Waer omme seitstu iacob ende spraecste israhel. mijn wech is verborghen van den here: ende van mijnen gode is mijn oerdel ouerleden?

28

En weetstu niet: ofte en heuestuus niet gehoert? Die ewelike god is die here. die sciep die termine der werelt: hine en sal niet gebreken noch arbeiden: noch sijnre wijsheit en is gheen ondersueken.

29

Die den moeden cracht gheuet: ende den ghenen die niet en sijn. starcheit ende vromicheit vermenichuoudicht hi.

30

Die kindere sullen ghebreken ende arbeiden: ende die ionghelinghe sullen vallen in crancheden.

31

Mer die inden here hopen sij sullen haer starchrit verwandelen. sij sullen vloghelen aen nemen als eenen aern. si sullen lopen ende niet arbeiden: si sullen wandelen ende niet amachtich worden.