Bible in duytsche (Delftse bijbel 1477)

§ Capittel .xxxviij.

1

IN dien daghe so was ezechias ziec totter doot: ende ysayas amos sone des propheten sone ghinc tot hem in ende seide hem. Dit seit die here. Ordinere dijn huys: want du sultste steruen ende niet leuen.

2

Ende ezechias keerde sijn aensicht ter want waert: ende hi bede ten here

3

ende hi seide. Ic bidde here. herdencke bid ic hoe ic ghewandelt hebbe voer di in waerheden ende in volmaecter herten: dat ic ghedaen hebbe dat guet is in dijnen oghen. Ende ezechias weende mit groten gheween

4

Ende des heren woert wort ghedaen tot ysayam segghende.

5

Ganc ende segghe ezechias. Dit seit die here god dauids dijns vaders. Ic hebbe ghehoert

[p. *381]

dine bedinghe: ende ic hebbe ghesien dijne tranen. Sich ic sal op dijne dage toedoen vijfthien iaer:

6

ende ic sal di beschermen van des conincs hant van assyrien. ende dese stat: ende ic salse behueden

7

Want dit sal di een teyken wesen vanden here: want die here dit woert doen sal dat hi gesproken heeft.

8

Sich ic sal weder doen keren die scaduwe vanden coerden daer sij mede nedergegaen was in achas horologium inder sonne achterwaert. thien coerden. Ende die sonne keerde weder thien koerden alde grade die sij nedercomen was.

9

Ezechias des conincs van iuda scrifture doe hi ziec geweest hadde: ende hi ghenesen was van sijnre ziecten.

10

Ic seide: in die middewaert mijnre daghen sal ic gaen ter poorten vander hellen. Ic sochte die ouerblijue mijnre iaren.

11

Ic seide ic en sal gode niet sien inder leuender lant. ic en sal den mensche niet scouwen voert meer: ende den woenre der rusten.

12

Mijn gheslachte is van mi ghenomen ende is te gader ghewonden: als der herden woninghen. Mijn leuen is afhesneden als van enen weuere: doe ic noch worde ghescheert so sneet hi mi af. Van des morghens tot des auonts sultstu mi eynden:

13

ic hoopte tot des mogens. Als een leeuwe also heeft hi alle mijn beenre te broken. Van des morgens totten auonde sultstu mi eynden.

14

Als eenre zwaluwen ionc also sal ic ropen: ic sal ghedencken als een duue. Mijne oghen zijn verdunt: op scouwende inden hogen Here ic gedoghe ouercracht antwoerde ouer mi.

15

Wat sal ic segghen: ofte wat sal hi mij antwoerden als hijt gedaen heeft. Ic sal herpensen alle mijne iaren in bitterheden mijnre zielen.

16

Here oftu aldus leefst: ende in dustanen dinghen is dat leuen mijns gheestes. So sultstu mi berispen ende leuende maken.

17

Sich in den vrede is mijns bitterheit alte bitter. Mer du beschermes mijne ziele datse niet veruaren en soude: du heefts arhter dinen rugghe gheworpen alle mijne sonden.

18

Want die helle en sal dij niet belyen: noch die doot en sal dij niet louen: die inden kuyl nedergaen en sullen dijn waerheit niet ontbeiden.

19

Die leuende die leuede hi sal di belyen also ic huden doe: die vader sal den kindere condmaken dijn waerheit.

20

Here make mi behouden: ende wij sullen onse psalme singhen alle die daghe ons leuens in des heren huys.

21

Ende ysayas beual dat sij nemen souden enen clomp vighen: ende dat sijse plasteren soude op die wonde ende si soude genesen.

22

Ende ezechias seide. Wat sal mij een teyken wesen dat ic opgaen sal in des heren huys?