Bible in duytsche (Delftse bijbel 1477)

§ Capittel .xxxvij.

1

ENde het gheuiel alst die coninc ezechias gehoert hadde so schoerde hi sijn clederen. ende dede enen sacroc aen: ende hi ghinc in des heren huys

2

Ende hi sende helyachim die bouen dat huus was. ende sobnam den scribe. ende die ouders vanden papen ouerdect mit sacrocken. tot ysayam amos sone des propheten:

3

ende sij seiden tot hem. Dit seit die coninc ezechias. Die dach der tribulacien ende des vernoys. ende der correctien. ende der blasphemien is dese dach: want die kinder sijn ghecomen totten gebaerne: ende en is gheen craht te ghebaerne.

4

Ofte in enigher manieren die here dijn god ghehoert rapsaces woerde: dien die coninc van assyrien sijn here ghesonden heeft om te blasfemeren den leuenden god: ende te verwiten mytten redenen die die here dijn god ghehoert heeft. Daer omme heffe op ene bedinghe ouer die ouerblijue vanden lande die vonden sijn.

5

Ende des conincs ezechias knapen quamen tot ysaiam:

6

ende ysaias seide tot hem Dit suldi uwen here segghen. Dit seit die here. En ontsich niet vanden aensichte der woerden die du ghehoert hebtste. daer mi des conincs knechten van assirien mede gheblasfemeert hebben.

7

Sich ic sal hem gheuen enen geest. ende hi sal horen ene boetscap. ende hi sal wederkeren te sijnen lande: ende ic sal hem

[p. *379]

doen vallen mitten zwaerde in sijnen lande.

8

Ende rapsaces keerde weder: ende hi vant den coninc van assyrien vechtende ieghen lobnam. Want hi hadde ghehoert dat hi ghetijt was van lachis

9

ende hi hoerde van tharacha den coninc van ethiopien die seide: hi is vte gecomen om ieghen di te stridene. Als hij dat ghehoert hadde: soe sant hi boden tot ezechiam segghende.

10

Dit suldi segghen ezechias den coninc van iuda segghende. Dijn god en bedriege di niet daer du in betrouwes segghende: iherusalem en sal niet werden ghegheuen in des conincs hant van assyrien.

11

Sich du hebste ghehoert wat ghedaen hebben alle die coninghen van assirien alle landen die sij omghekeert hebben: ende sultstu moghen werden verlost?

12

Der heydene gode en hebben sise niet beschermt. die mine vaderen omghekeert hebben: gozam ende aran ende reseph ende die kinder van eden die waren in thalassar?

13

Waer is die coninc van emath ende die coninc van arphad ende die coninc der poert sepharuaym. ana ende aua?

14

Ende ezechia nam die letter van der boden hant ende lasse: ende hi ghinc op in des heren huys. ende hi ontdeedse voer den here.

15

Ende hi aenbede voer den here ende seide.

16

Here god vanden scaren god van israhel die sitste op cherubin. du biste alleen god van allen riken der werlt: du makes den hemel ende aerde.

17

Helde neder here dijn ore ende hore: ondoch dijn ogen here ende aensich: ende hore alle sennacheribs woerde die hi ghesonden heeft omden leuenden god te blasphemerene.

18

Want waerlijc here so bebben die coninghen van assyrien die lande ende hare rike woest gemaect.

19

ende si hrbben der lande gode den vyere ghegeuen: want ten waren gheen goden mer werke van menschen handen. hout ende stene. ende si hebbense te broken.

20

Ende nv here god behoude ons van sijnre hant: dat alle die riken der werelt moeten bekennen. want du biste die here onse god alleen.

21

Ende ysaias amos sone sandt tot ezechiam ende seide. Dit seit die here god van israhel Om die dinghen daer du mij om ghebeden heuest van sennacherib den coninc van assirien:

22

dit is dat woert dat die here ghesproken heuet op hem. Di veronwaerde. die versmade die maget der dochter van syon: van di sal dat hoeft roeren der maghet die dochter van iherusalem.

23

Wien heefstu verweten. wien heefstu gheblasphemeert: ende op wien heefstu dijne stemme verheuen. ende die hoocheit van dijnen oghen? Ten heilghen van israhel.

24

In dijnre knechten hant heuestu den here veronwaert ende heefste gheseit. In die menichte mijnre waghenen bin ic opgegaen op die hoechede der berghen. op die toppe van libanus: ende ic sal ofhouden die hoecheden sijnre cederen. ende die wtvercoren vuerenboem daer of: ende ic sal ingaen die hoecheit sijnre hoocheden den bossche van sijnen woude:

25

heb ic begrauen ende ic heb dat water ghedroncken: ende ic heb mitten voetstappen mijns voets verdroghet alle die beken der ackeren.

26

Ende heefstuut niet

[p. *380]

ghehoert dat ic wilen ghedaen hebbe Van ouder daghen so sciep ic dit. ende nv heb ik toebracht: ende dit is ghesciet in een ontwortelen der berge die onderlinghe striden. ende der gemuerder steden.

27

Die ghene die inden steden woenden vreseden hem om dat mijne hant ghecort was. ende sij worden bescaemt: si worden als hoy vanden acker ende als gras vander weiden: ende als cruut vanden daken dat verdroghede eert ripe wort.

28

Dine woninghe ende dijn inganc ende dijnen wtganc bekende ic: ende dijne sotheit ieghen mij.

29

Altstu verwoedes teghens mi: soe quam dijne houaerde op in mijnen oren. Daer om sal ic in dinen naselocken doen enen rinc. ende enen breidel in dijnen lippen: ende ic sal di wederleiden in dinen wech aldaer du comen biste

30

Ende dij sal dit een teyken wesen. Eet dit iaer dat al willens wassen sal: ende inden anderen iaer soe eet vanden appelen. Mer inden derden iaer saeyt ende ouxt. ende plant die wijngaert: ende eet haer vruchten:

31

ende dat. dat behouden wesen sal van iudas huyse sal hi wtsenden. ende dat ouerblijuen sal. dat sal schieten die wortelen nederwaert. ende het sal vrucht opwaert maken.

32

want wt iherusalem sullen wtcomen ouerblijue: ende behoudenisse vanden berghe van syon. Die minne des heren vanden scaren sal dit doen.

33

Daer omme seit dit die here vanden coninc van assyrien. Hi en sal in dese stat niet comen ende hi en sal daer ghene ghescutte schieten. ende ghene schilt en sal hem becommeren: ende hij en sal omme die stat ghene drachte draghen.

34

Inden wech aldaer hi ghecomen is aldaer sal hi wederkeren. ende binnen deser stat en sal hi niet comen seit die here.

35

Ende sal dese stat beschermen om dat icse behouden sal. om minen wille ende om dauid mijnen kuecht.

36

Ende des heren enghel quam wt ende versloech inden ghetelden van assyrien hondert dusent ende vijf ende tachtich dusent mannen. Ende si stonden vroech op. ende sich sij waren alle croendien van doden luden.

37

Ende hi trac wt ende ghinc wech. Ende sennacherib die coninc van assyrien keerde weder: ende hi woende in niniue.

38

Ende het gheuiel doe hij aenbede in nesrachs tempel sijnen god adramelech ende sarasar. sine sonen verslogen mitten zwaerde: ende sij vloghen int lant van ararath: ende assaraddon sijn sone regneerde ouer hem.