Bible in duytsche (Delftse bijbel 1477)

§ Capit .xxxv.

1

HEt sal verblijden die wildernisse ende die sonder wech is: die enicheit sal vervrouden: ende bloeyen als die lelye.

2

Groeyende sal hi groeyen: ende sij sal verblijden vol vrouden ende louende Die glorie des lybanus is haer ghegeuen: die schoenheit van carmelus ende van saron. Si sullen sien des heren glorie: ende die schoenheit ons gods.

3

Gestarct die crancke hande: ende verstijft die crancke bene.

4

Segt den weemoedighen: wert vrome ende en wilt niet ontsien. Siet onse god sal toebrengen die wrake des loens: god hi sal comen ende ons behouden.

5

Dan sullen der blinder oghen ondaen worden: ende der douer oren sullen gheopent worden.

6

Dan sal springen die crepel als een hert. ende der stommer tonghe sal open wesen: want inder wildernisse sijn die watere gestoert. ende die riuieren inder enicheit

7

ende die droghe was is worden in viuers. ende die dorstich was in fonteynen

[p. *377]

van wateren In die bedsteden daer te voren draken in woenden. daer sal wassen die grootheit van riede ende van biesen:

8

ende daer sal wesen een pat ende die wech sal heilich gheheten worden Daer dore en sal gene besmette ouer liden: ende dit sal v wesen die rechte wech: alsoe dat die sotte doer dyen wech niet dwalen en sullen.

9

Noch daer en sal niet wesen die liebaert: noch gene quade beeste en salre niet dore opgaen noch men salse daer niet vinden Ende si sullen wandelen daer. die verlost sijn ende behouden vanden here:

10

si sullen bekeert worden ende sullen comen in syon mit loue: ende ewelike blijscap sal wesen op haer hoeft. Ende si sullen behouden vroechde ende blijscap: ende rouwe ende versuchten sal vlien