Bible in duytsche (Delftse bijbel 1477)

§ Ca .xxxiiij.

1

GHi heydene coemt voert ende hoert. ende volc verstaet: die aerde moet horen ende hare volheit. die werelt ende alle haer groeynisse:

2

want des heren onwaerdicheit is op allen luden. ende sijn toren op haer quaetheit. Hi heeftse versleghen. ende hi heeftse ghegheuen inden dootslach.

3

Haer versleghen sullen werden wtgheworpen: ende van haren croendien sal stanc opgaen Die berghen sullen smelten van haren bluede.

4

ende al dat ridderscap des hemels sal worden bescaemt: ende die hemele sullen te gadere worden ghewonden als een boec: ende alle haer ridderscap sal ofvallen alsoe dat blat ofvalt vanden wijngaert ende vanden vigeboem.

5

want mijn zwaert is ghesaet inden hemel. Siet hi sal nedercomen in ydumean: ende op dat volc mijnre dootslach ten oerdele.

6

Want des heren zwaert is veruolt van bluede: vet vanden

[p. *376]

smoute vander lammer ende der bucken bluede: ende vanden bluede der gemerchder rammen. Want des heren offerhande is in bosra: ende grote dootslach int lant van edom.

7

Ende die eenhoerne sullen mit hem nedercomen: ende die stiere mitten machtighen: Dat lant sal worden ghesaet van haren bluede. ende haer aerde vanden vetten ruete:

8

want het is die dach van des heren wrake: tiair der gheldinghe des oerdels van syon

9

Ende hare riuieren sullen worden verwandelt in pecke: ende haer aerde in sulphur.

10

Ende haer lant sal wesen in barnende peck des nachts ende des daghes: ten sal nemmermeer worden ghebluscht Die roec sal opgaen van gheslachte in gheslachte: ende werden bedroeft ewelijc ende emmermeer. Nieman en sal wesen ouerlidende doer dit lant:

11

ende het sullen besitten die onocrotalus ende die ericius: ende ybis ende die rauen daer in wonen sullen. Ende ouer dit lant sal die mate ghestrect worden om datment te niet maken sal: ende des metsers regule in bedructheden.

12

Haere edele lude en sullen daer niet wesen: mer si sullen bet den coninc aenroepen: ende haer princen sullen wesen in nyete.

13

Ende in des lants huysen sullen wassen doerne ende netelen. ende palyurus in haren vasten steden: ende het sal wesen der draken nest ende der struzen weyde:

14

ende daer sullen te ghemoete lopen die duuelen onocentaurus. ende die wildeman si sullen daer ropen deen anden anderen. Daer sal legghen lamia ende si vant ruste daer te haerre behoef.

15

Daer hadde ericius een gracht. ende daer voede hi op sijn ionghen ende omdelfdze ende voedze in hare scaduwe. Daer worden vergadert die wuwen. die ene ten ander.

16

Ondersoket naerstelijc in des heren boec ende leest. een van dien en ghebracker niet. die ene en vraghedes den anderen niet want dat wt mijnen monde comt dat heeft hi geboden: ende sijn gheest heuetse vergadert:

17

ende hij heeft hem lot gheworpen. ende sijn hant heeft dit lant den beesten ghedeylt in maten. Tot inden eweliken sullen sijt besitten: ende vanden gheslachte inden gheslachte sullen si daer in wonen