Bible in duytsche (Delftse bijbel 1477)

§ Capittel .xxxiij

1

WEe dij die roeft. En sultstu oeck niet werden gheroeft? Ende die verouwaerdes: en sultstu oeck niet werden veronwaert. Als du dijn rouen gheeint hebtst soe sultstu gheroeft werden: alstu van moetheden laets te veronwaerden. soe sultstu veronwaert worden.

2

Here ontferme ons want wij hebben di ontbeit: wes onse arm in die morgenstonde: ende onse salicheit inden tide des vernoys

3

Van des engels stemme vloech dat volc: ende van dijnen verheffen sijn die heydene ghespraeyt.

4

Ende uwe rouen sullen werden vergadert alsomen brucus vergadert: gelike alser die grachte vol of sijn.

5

Die here is ghegroot. want hi woende inden hogen: hi heeft veruolt syon mit vonnisse ende mit gherechticheden:

6

ende gheloue sal wesen in dinen tiden. Die rijcheden der wijsheden. sijn salicheit ende const: des heren vrese is sijn tresore.

7

Siet die siende sullen ropen daer buyten: die engelen des vreden sullen bitterliken wenen.

8

Die weghe sijn ghescheiden: hij liet achter die dore den pat te lidene plach: die belofte is te niet gheworden hi heeft die steden verworpen: hi en achte die mensche niet.

9

Dat lant droefde ende quelde: bescaemt wort libanus ende wort verdoeft. Ende saron is gheworden als die wildernisse: ende basan is besloten ende carmelus.

10

Nu sal ic op verstaen seit die here: nv sal ic worden verheuen

11

Ghi sult ontfaen hitte ende ghi sult ghebaren stoppelen: v gheest sal v verslinden als vyer:

12

ende die volken sullen wesen als assche vanden brande:

[p. *375]

doerne vergadert sullen worden verbarnt mitten vyere.

13

Hoert die verre sijt wat ic ghedaen hebbe: ende bekent ghi ghebuere mijne starcheit.

14

Die sondaren sijn verderft in syon: die anxte heeft die ypocriten bezetn. Wie mach van v luden wandelen mitten verslinenden vyere: of wie sal van v luden wonen moghen mitten eweliken hetten

15

Die wandelt inden gherechticheden ende die waerheit spreect: die verworpt die ghiericheit van ouerdadicheden: ende wtscuddet sijn handen van alre ghiften Die sijn oren stopt dat hi die sonden niet en hore: ende sluyt sijn oghen dat hi gheen quaet en sie.

16

Dese sal al inden hoghen wonen: die verzekerheit vanden stenen is sijn hoecheit broot is hem ghegheuen: sijn wateren sijn getrouwe.

17

Sijn oghen sullen den coninc sien in sijnre schoenheit: si sullen die werlt van verre scouwen.

18

Dijn herte sal pensen vrese. Waer is die geletterde. waer is hij die de woerden des wets weget: waer is die lerer der cleinre?

19

Du en sultste niet sien onwise volc. dat volc van hogen woerden: also dattu niet en sultste moghen verstaen die behendicheit sijnre tonghen: inden welke ne ghene wijsheit en is.

20

Aensich syon die stat onser feesten. Dine oghen sullen sien iherusalem die rike stat. die woninghe diemen ne gheen sins en mach hervoeren noch nemmermeer en sullen hare slotele ghenomen werden. ende alle haer linen en sullen niet werden te broken:

21

want alleen so is daer die here onse god groot Die stat der riuieren sijn hoghe beken ende openbaer: doer die stat en quam niet in. gheen scip mit riemen. noch cogghe en salre doer liden.

22

Want die here is onse vonnissere: die here is onse wetdragher: die here is onse coninc. Hi sal comen ende hi sal ons behouden.

23

Dijne coerden sijn gheslapt: mer sij en sullen niet te bouen come. Also daen sal dijn mast wesen: dattu niet en sultste moghen dijn teken gewiden. Dan sal worden gedeylt die roue van vele proeyen: die cropele sullen den roef rouen:

24

noch dijn ghebuere en sal niet segghen. ic bin vercranct. Dat volc datter binnen woende: van hem sal die ongerecticheit ghenomen werden