Bible in duytsche (Delftse bijbel 1477)

§ Capittel .xxxij

1

SIet die coninc sal regneren in sijne gherechticheit. ende sijne princen sullen bouen wesen in die vonnisse:

2

ende die man sal wesen als die verborghen wert vanden winde. ende hem verberghet vanden tempeest: als beken van wateren in dorste. Ende als scaduwe eens hoghes steens inden wilden landen.

3

der siender ogen en sullen niet verdonckeren. ende die oren der horende sullen naersteliken toehoren:

4

ende der sotter herte sal verstaen die conste: ende der stamerender tonge sal haestelic spreken ende claerlijc.

5

Voertmeer en salmen den ghenen die onwijs is niet heten princen: ende den bedriegher en salmen niet heten den meesten.

6

Want die sot sal sotheden spreken. ende sijn hert sal ongerechticheit doen: om te voldoen gheuenstheyt. ende te spreken ten here loeflijc: ende hi sal ydel maken des hongherichs ziele. ende hi sal den ghenen die dorst heuet sijnen dranc nemen

7

des loeses vate sijn alte quaet Want hi sprac ghepense om te verliesen die sachtmoedighe in woerden in loghene: als die arme sprac in vonnisse:

8

Mer die prince sal pensen die dinghen die waerdelic enen prince toebehoeren: ende hi sal bouen die leidsmannen staen.

9

Ghi rike wiue staet op. ende hoert mijn stemme: ghi dochteren die betrouwen hebt

[p. *374]

begrijpt mitten oren mijne sprake.

10

Na daghe ende een iaer. ende ghi sult worden verstoert die betrouwende sijt. Want dat wijngaert lesen is gheeynt: voertmeer en sal gheen vergaderen des wijngaerts comen.

11

Verwondert ghi rijke wiue. wort verstoert ghi betrouwende ontcleet v ende wert bescaemt: gort toe v lenden op v borst.

12

Weent op v begheerlijc lantscap: opten drachtighen wijngaert.

13

Op mijns volcs lant sullen doerne ende brame opcomen. hoe vele meer op alle dese huse der blijscap der verblijdender stat.

14

Want dat huys is gelaten. die menichte vander poert is achter ghelaten: ende donckerheyden ende tasten sijn gheworden op der moerdenaers spelunke tot inden eweliken. Der wilder beesten blijscap is der cudden weide:

15

tot dat op v sal worden wtghestort die gheest van bouen Ende die wildernisse sal wesen in chermel. ende chermel sal in enen woude worden gheacht:

16

ende inder wildernisse sal wonen dat vonnisse: ende die gherechticheit sal sitten in chermel.

17

Ende dat werc der gherechticheit sal wesen vrede. ende die oefeninghe des gherechticheits gheswijch: ende sekerheit tot inden eweliken.

18

Ende mijn volck sal sitten in die schoenheit des vreden: ende inden woninghe der betrouwenissen ende in riker rusten.

19

Want haghel valt inder dellinge des woudes: ende mit vernederen sal vernedert worden die stat.

20

Salich sidi die saeyt op alle wateren: daer insendende des ossen ende des ezels voet.