Bible in duytsche (Delftse bijbel 1477)

§ Capittel .xxx.

1

WEe v kinder achterlaters seyt die here. dat ghi raet dedet ende niet wt mi. ende dat ghi scheert linen laken ende niet bi mijnen gheest. soe dat ghij sonde op die sonde gadert:

2

die wandelt

[p. *371]

om neder te gaen in egipten. ende en vraghedes minen monde niet: hopende hulpe in pharaons starcheit. hebbende betrouwen in die scaduwe van egipten:

3

ende pharaons starcheit sal v wesen in lachtere: ende dat betrouwen der scaduwen van egipten in scanden

4

Want dine princen waren ghegaen in thanes: ende dijn boden quameu tot thanes.

5

Si sijn alle bescaemt opten volke dat hem niet vorderen en mochte. Si en waren niet in hulpen. ofte in enighe oerbaerlicheit: mer in lachtere ende in scanden.

6

Die last der beesten van zuden. Inden lande der tribulacien ende des verdriets. leeuwinne ende die liebaert. wt hem is een slanghe. ende een vlieghende serpent: draghende opter beesten scouderen haer rijcheden. ende haer tresore op des kemels bult: totten volke dat hem niet vorderen en mochte.

7

Want egipten sal om niet ende ydelic helpen. Hier om soe riep ic hier op hets allene houaerde ruste.

8

Nu daer om alstu daer in comen bist so scrijfste opt palm houte: ende bescrijft dat naerstelijc in enen boec: ende het sal wesen in den vtersten daghe in oercondscap tot inden eweliken.

9

Want hets volc dat verporrende is tot gramscappen. ende loghenachtige kindere. kinderen die niet horen en willen die wet gods.

10

Die den sienden segghen en wilt niet sien: ende den scouwenden en wilt niet scouwen ons die dingen die recht sijn. Spreect dat ons ghenoghet: siet ons dolinge: duet van mi den wech.

11

keert van mij den pat: van uwen aenschijn houde op die heylighe van israhel.

12

Hier om soe seit dese die heylige israhel. Om dat ghi dat woort hebt veronwaert. ende hebtste ghehoopt in die ouerdadicheit ende int geruchte. ende dat ghi daer op gheleent sijt:

13

daer om sal v dese ongherechticheit wesen. als ene ghescoerde vallende muyer: ende ondersocht in enen hoghen muer. Want haestelijc alsment niet en waent sal sijn vertreden comen:

14

ende hi sal werden te broken in stucken alsoe als een aerden potmakers test te broken wort mit groten stotene: ende men sal niet vinden van sijnen stucken een scerf. daer men een cole vyers in draghen mochte wt den vyere: of daermen in sal moghen sceppen een luttel waters vter gracht:

15

want dit seit die here god van israhel. Ist dat gij wert bekeert ende ghi gherust: so suldi behouden wesen. In gheswighe ende in hope sal uwe starcheit wesen. Ende ghi en woudes niet:

16

ende seit. Neen niet: mer wi sullen ten paerden waert vlyen. Hier om suldi vlyen. Ende op snelle paerden sullen wi sitten. Hier om sullense snelre wesen die v nauolghen sullen.

17

Dusentich manne vanden aensichte eens anxtes ende vanden aensichte des anxtes vanden wijuen suldi vlyen: tot dat ghi sult worden ghelaten als die mast van enen scepe opten top van enen berghe: ende als een teyken op enen houel.

18

Hier om ontbeit die here om dat hi uwes ontfermen sal: ende hier om sal hi werden verheuen v sparende: want god des oerdels is die here: salich sijn si alle dien ontbeiden.

[p. *372]

19

Want dat volc van syon sal wonen in iherusalem. Wenende en sultstu ne gheen sins wenen: ontfermende sal hi dijns ontfermen. Ter stemmen dijns ropens thans als hijt ghehoren sal soe sal hi di antwoerden.

20

Ende die here die sal di gheuen ghebrec broots. ende cort water: ende hi sal voertmeer van di doen wechgaen dine lerer: ende dine oghen sullen wesen siende dinen ghebiedere:

21

ende dijn oren horende dat woort des gheens die van achter den rugghe di vermanen sal. Dit is die wech. wandelt daer inne ende en keert v niet of ter rechterzide noch ter slinckerzide.

22

Ende du sultse besmetten die platen der beelden van dijnen siluer: ende dat cleet des afgods van dijnen goude: ende du sultste die dingen stroyen als die onreynicheit eens wiues die haer maentsuueringhe ghedoget. Ganc wt. ende du sultste hem segghen.

23

Ende dijnen sade sal worden ghegheuen reghen soe waer dattu sayen sultste inden lande: ende dat broot van dijnre vrucht van dinen lande alte drachtich ende vet. Si sullen worden gheuoet in dijnre possessien in dien dage sal dat lam wesen wijt ende breet:

24

ende dine stieren ende volenen vanden ezelen die dat lant wenden. si sullen eten ghemengede gerste als sij op die dorschuloer ghewannet is.

25

Ende het sullen wesen op elken hoghen berch. ende op elken verheuen houel beken van lopenden wateren inden daghe der dootsacht veelre lude: als die toornen gheuallen sullen sijn.

26

Ende der manen licht sullen wesen als der sonnen licht. ende der sonnen licht sal wesen seuenuoudich als dat licht van seuen daghen: inden dage als die here verbinden sal sijn volcs wonden: ende als hij ghenesen sal den slach van haren wonden.

27

Siet des heren name comt van verren: sijn barnende toren: ende zwaer te draghen. Sijn lippen sijn veruolt van onwaerdicheden: ende sijn tonge als een verslindende vyer

28

Sijn gheest sal wesen als een ouerlopende riuier tot midden den halse. om te verliesen die heydene te nyete: ende den breidel der dolingen die inder volken wanghen was.

29

Sal v wesen een lyedekijn als dat gheluut eenre geheilichder feesten: ende blijscap der herten als die gaet mit eenre floyte: om te gaen op gods berch ten stercken van israhel

30

Ende die here sal doen horen die glorie sijnre stemmen: ende hi sal toghen den anxt sijns arms in ghedreich van toorne. ende een vlamme van verslindende vyere. Sal hi bestoten in bedrusche: ende in haghelstene.

31

Want van des heren stemme sal hem assur ontsien geslaghen mit eenre rueden:

32

ende dat ouerlijt vander rueden sal wesen vast die de here sal doen rusten op hem. In harpen ende in tamburen ende in sonderlinghen striden so sal hijse veruechten

33

Want van ghisteren is bereet tophet: vanden coninc bereet: diepe ende wijde. Voetsele daer of is dat vyer. ende vele houte: geblas des heren als een ryuier van sulfere diese ontsteect