Bible in duytsche (Delftse bijbel 1477)

§ Ca .xxix

1

WEe ariel. ariel die stat die dauid verwan. Daer is van iare ten iare toeghedaen: die feestelike dage sijn ouerleden.

2

Ende ic sal omme legghen ariel. ende du sultste wesen droue ende serich: ende het sal mi wesen als ariel.

3

Ende ic sal omlegghen als enen ronden rinc al omme ende omme di: ende ic sal ieghen di doen draghen dracht: ende ic sal versekertheden legghen in dijn omlegginghe.

4

Du sultste worden vernedert du sultste vander aerden spreken: ende wt der aerden salmen dijne stemme horen. Ende dijne stemme sal wesen als ene phitoens wt der aerden: ende wt der aerden sal sijne sprake vezeken. Ende die menichte der geenre die di wech waeyen sullen. sal wesen als cleyn ghemul:

5

ende die menichte der gheenre die ieghen di vermoghen sullen. sal wesen al een spranckel ouerlidende.

6

Ende dit sal wesen haestelijc ende snellijc vanden heren vanden scaren. si sal worden gheuisiteert in donreslaghen. ende in berueringhen der aerden: ende in groter stemmen van geruchte ende van tempeest ende van verslindender vlammen van vyere.

7

Ende die menichte alre heydene die vochten iegheu ariel. sal wesen als een droem van nachteliken visioen. ende alle die ghene die ieghen ariel oerlogeden ende diese beleiden ende diese verwonnen.

8

Ende also enen hongherighen slaept ende eet. ende als hi ontwaect sijne ziele ydel is: ende alsoe ene dorsteghe slaept ende drinct. ende na dien dat hi ontwaec is dat hi van moetheden noch dorst heuet. ende sijne ziele ydel is: also sal

[p. *370]

sijn die menichte alre heydene die vochten ieghens den berch van syon.

9

Scaemt v ende wort verwondert. sijt onghestadich ende beeft. Wort droncken ende niet vanden wijn: wort beruert ende niet van dronckenscap:

10

want die here heeft v gemenghet den geest van slape. Hi sal uwe ogen sluyten: uwe propheten ende v princen die visioen sien sal hi ouerdecken.

11

Ende v sal wesen haerre alre visione als die woerde van enen besloten boke: ende als si dien ghegheuen hebben enen die letteren kan so sullen si hem segghen lese desen: ende hi sal antwoerden ic en mach. want hij is ghesloten.

12

Ende men sal den boke gheuen enen die gheen letteren en kan ende men sal hem segghen leest: ende hi sal segghen: ic en kan gheen letteren.

13

Ende die here seide. Om dat dit volc genaect mij mit sijnen monde ende mit sijnen lippen mij loeft. mer haer herte is verre van mij: ende si hebben mij ontsien inder menschen gebode ende leringhe:

14

siet hier om sal icker toedoen. dat ic verwonderen maken sal desen volke mit groten wondere ende dat te ontsien wesen sal. Want die wijsheit sal veruaren van sijnen wijsen: ende die verstandenisse sijnre vrueder lude sal worden verborghen.

15

Wee die diep van herten sijt. dat ghi vanden here verberghet den raet: welker werc in donckerheden sijn. ende si seggen Wie siet ons. ende wie kent ons?

16

Dit is uwe gepens verkeert. Of als die potaerde pensde teghen den pottemaker. ende dat een werc sijnen makere seide. du en hebste mi niet gemaect ende dat een ghemaect dinc seide sijnen maker du en verstaes niet. en sal noch niet een luttel

17

ende in corten tiden die libanus worden verwandelt in chermel. ende chermel niet worden gheacht in enen woude?

18

Ende in dien daghe sullen horen die woerden des boecs die doeue: ende vander donckerheden ende deemsternissen der blinder oghe sullent sien.

19

Ende die sachtmoedighe sullender inden here blijscap toedoen. ende die arme menschen sullen verblijden inden heilighen van israhel:

20

want hi is te niet gheworden die machtich was: die bespottere is verteert: ende sij sijn alle ontsteken die waecten op die ongerechticheit:

21

die sondigen deden den menschen inden woerde. ende si scrinckelden daer neder den ghenen die berispte in die poorte: ende si keerden hem te vergheues vanden gherechtighen.

22

Om dit seit dit die here tot iacobs huse die verloste abraham. Iacob en sal nv niet bescaemt worden: noch nv en sal hem sijn aensicht niet bescamen.

23

mer als hi sien sal sijn kinderen die wercken mijnre handen. in midden hem heylighende mijnen name: ende sij sullen heilighen den heylighen van iacob. ende israhels god sullen sij prediken:

24

ende die dolende sullen weten inden gheest der verstandenisse: ende die beclaghers sullen die wet leren.