Bible in duytsche (Delftse bijbel 1477)

§ Capittel .xxviij.

1

WEe der cronen der houaerdicheit. den dronckenen van effraym. ende der afuallender blomen. der glorien sijnre blijscap: die waren inden toppe der vetstere valeye dolende vanden wijne

2

Siet die machtighe ende die starcke heer. als dat bedrusche eens hagels een risende gheruchte: als dat gheruchte van vele wateren die oueruloyende sijn: ende wtsendet op een wijt lant.

3

Mitten voeten sal vertreden worden die crone der houaerdicheit der dronckenre

[p. *368]

van effraym.

4

Ende die blome der glorien sijnre gramscap sal afuallende wesen. die is opten top der valeyen vanden vetten: als tijtlike vrucht voer die rijpheit vanden herfste. Twelke doen hijt aensach siende: te hant als hijse mitter hant hebben sal soe sal hi die vrucht verzwelghen.

5

In dien daghe so sal die here vanden scaren wesen een croen der glorien. ende een conincs stoc der blijscap den ouerblijue sijns volcs:

6

ende een gheest des vonnissen den ghenen die sitten sal op dat vonnisse: ende een stercheit den ghenen die weder keren sullen vanden stride te poorten.

7

Mer dese oeck om des wijns wille en wisten sijs niet: ende ouermids dronckenscap doelden sij. Die priesteren ende die propheten en wistens niet ouermids der dronckenscap: si sijn verbolghen vanden wine ende sij doelden in dronckenscap: sine wisten den siende niet: sine wisten dat vonnisse niet.

8

Want alle tafelen sijn veruolt mit ghespuinghe ende mit vuylicheden: soe dat voert ne gheen stad en was.

9

Wien sal hij leren consticheit: ende wien sal hi doen verstaen dat horen? Die gespeent is vander melc ende afghesteken vanden borsten:

10

want ghebiede ende herghebiede. ghebiede ende herghebiede: ontbeide ende herontbeide. ontbeide ende her ontbeide luttel daer luttel daer.

11

Want in spraken des lippen ende in anderen tonghen sal hi spreken tot desen volke:

12

dien hij gheseit heeft. Dit is mijne ruste: vermaect den moeden. ende dits mijn vercoelen: ende sij en woudens niet horen

13

Ende hem sal des heren woert wesen. ghebiede herghebiede. ghebiede hergebiede. ontbiede herontbiede ontbeide herontbeide. luttel daer luttel daer dat si gaen ende vallen achterwaert. ende werden vertreden: ende werden inden stricke vaste gheuaen.

14

Om dit hoert des heren woert ghi manne bespotters die heerscappie hebt bouen mijn volc dat in iherusalem is.

15

Want ghi hebt gheseit. Wi hebben beloften gheslaghen mitter doot: ende wi hebben ghemaect eendrachticheit mitter hellen. Die ouerlopende gheesele als sij ouerliden sal so en sal si niet comen op ons: want wi hebben die loghene gheset onse hope: ende mitter loghene sijn wi beschermt.

16

Hier om seit dit die here god. Siet ic sal legghen inden fondamenten van syon enen hoecsteen ende gheproeft. preciose gefondeert inden fondamenten. Die gheloeuen sal en haeste hem niet.

17

Ende ic sal in gewichte setten dat vonnisse: ende die gherechticheit in maten. Ende die haghel sal omwerpen die hope der loghenen ende beschermenisse des waters sullen sij oueruloyen:

18

ende uwe belofte mitter doot sullen werden afghedaen: ende uwe eendrachticheit mitter hellen en sal niet staen Die ouerlopende gheesel als sij ouerliden sal: ghi sult haer sijn in vertreden.

19

Soe waer sij ouerliden sal si sal v nemen: want vroech inder dagheraet sal die gheesel ouerliden inden daghe ende in die nacht: ende al mit allen sal die moeynisse allene verstandenisse gheuen den ghehoer.

20

Want dat bedde is

[p. *369]

vernauwet. also dat die een daer of vallet: ende ene corte ouerdecsele en machse beide niet ouerdecken

21

Want als in den berch der scheidinghen sal die here staen als inder valeyen die is in gabaon sal hi verbolghen worden: om sijn werc te doen. Sijn werc is vreemder dat hi wercket sijn werc Sijn werc is vreemde van hem.

22

Ende nv en wilt niet bespotten: dat machschien uwe banden niet en werden vernauwet. Want een eynden ende een vercorten heb ic ghehoert vanden here god vanden scaren op al dat lant.

23

Begrijpt mitten oren ende hoert mijn stemme: verstaet ende hoert mijn sprake.

24

En sal die ackerende alden dach niet ackeren. om te saeyen: doersnidende. om sijn lant te doerscoerne?

25

Als hi sijns lants aensichte heeft effen ghemaect en sal hij niet saeyen gith ende cyminum sprayen: ende die taewe legghen bi ordinancien ende die gherste ende milium ende vicina in sijnen eynden?

26

Ende sijn here salne leren: in vonnisse sal hine leren.

27

Want in bokers en salmen gith niet dorsschen: noch gheen wiel van waghene en sal ommegaen op cyminum: mer mit een ruede salmen gith wtslaen. ende cyminum mit enen stoc:

28

mer dat broot salmen breken. Mer niet ewelijc en sal hi dorsschende dat broot niet dorsschen: noch dat wiel vanden waghene en salten niet quellen: noch mit sijnen claeuwen en sal hijt niet breken.

29

Ende dit is wtghegaen vanden here gode vanden scaren: dat hi doen soude wonderliken raet: ende verheffen die gerechticheit