Bible in duytsche (Delftse bijbel 1477)

§ Capittel .xxvij.

1

IN dien daghe sal die here visiteren in sijn zwaert. hart groet ende starc. op leuiathan dat serpent den grendel. ende op leuiathan dat cromme serpent: ende hi sal doden die waluissche die in die zee is.

2

In dien daghe sullen louen dien wijngaert des puers wijns.

3

Ic bin die here die den wijngaert behoude: haestelijc sal ic hem schencken: dat machschien ieghen hem niet en werde gheuisiteert. Nacht ende dag houde ic hem:

4

onwaerdicheit en is in mij niet. Wie sal mij gheuen doren ende brame in stride? Ic sal daer opgaen. ende salt te gader verbernen.

5

Ofte sal ic bet houden mine starcheit? Hi sal mi vrede maken: vrede sal hi mij maken.

6

Die ingaen mit gheruchte tot iacob. ende israhel sal bloeyen ende groeyen: ende si sullen dat aensichte der werelt veruollen mit sade.

7

Ende sloech hi dat volc niet nader plaghen des gheens die hem sloech? Oft also hij sijne versleghene dode ist volc alsoe niet verslaghen?

8

In maten ieghen die mate als sij verworpen wesen sal soe sal hijse oerdelen hi heeft gepenst in sinen herden gheest inden daghe der hetten.

9

Hier om sal op dit verlaten worden iacobs huse die gerechticheit: ende dit is alle die vrucht dat alle sijn sonde afghedaen worde. Als hi setten sal alle die stene vanden outare als steen der asschen die ontween ghestoten sijn: die bussche ende der afgoden tempel en sullen niet staen.

10

Want die stat die wilen versekert was sal verwoest worden: die schone stat sal worden ghelaten ende men salse laten bliuen als ene woestijne. Daer sal dat calf weiden ende daer salt legghen: ende het sal verteren hare toppen:

11

Inder droecheit haers ouxtes sullen vertreden worden comende wiue ende diese leerden Want ten is ne ghene wijs volc: daer omme sal hi sijns niet ontfermen diet ghemaect heuet: ende diet gheformeert heuet: en sal dat volc niet sparen.

12

Ende het sal wesen in dien daghe. soe sal die here slaen vanden gronde der riuieren totter riuieren van egipten: ende ghij sult vergadert worden een ende een kinder van israhel.

13

Ende het sal wesen in dien daghe. soe salmen trompen inder groter trompen: ende sij die verloren waren sullen comen vanden lande van assyrien ende die verdreuen waren vten lande van egipten: ende sij sullen gode aenbeden inden heylighen berghe in iherusalem.