Bible in duytsche (Delftse bijbel 1477)

§ Ca .xxvi

1

IN dien daghe salmen dat liedekijn singhen inden lande van iuda. Die poort onser starcheit is syon: die behouder salre in worden gheset muyre ende wtbaelgie.

2

Doet op die poorten. ende die gherechtighe heydene comen in: die houdet die waerheit

3

Die oude dolinghe is wech ghedaen: du sultste houden den paeys: den paeys. want here in di hebben wij ghehoept

4

Ghi hebt ghehoopt inden here inden eweliken.

5

Want hi sal neder doen bocken die wonen inden hogen: hi sal die hoghe stat vernederen. Hi sal die vernederen totter aerden hi sal die nedertrecken totten ghemul.

6

Die voet salse verteden: des arms voete: der maten screde.

7

Des gherechtichs mans pat is recht: des gherechtichs wech is recht om daer in te wandelen.

8

Here inden pade dijnre vonnissen hebben wi dijns ontbeit: dijn name ende dijn ghedencken is inder zielen begheerten.

9

Mijn ziele sal di begheren in die nacht: mer oec mit minen gheest inden binnensten mijnre herten sal ic totti waken. Altstu dine vonnisse sultste hebben ghedan in die werlt: dan sullen gherechticheit leren alle die in die werelt wonen.

10

Ontfermen wi des ghenadichs: ende hi en sal niet leren te doen gherechticheit. Inder gherechtigher lant dede hi ongherechtelijc: ende hi en sal des heren glorie niet sien.

11

Here dijn hant moet werden verheuen dat sijs niet en sien: benidende volc moet sien ende werden gheschent: ende dat vyer moet dijnen vianden verslinden.

12

Here du sultste ons paeys gheuen. want alle onse werke heueste ons ghewracht.

13

Here onse god. heren hebben ons bezeten sonder di: allene moeten wi in di dijns namen ghedencken.

14

Die steruende en moeten niet leuen: ende die gyganten en moeten niet verrisen Daer om hebtstuse gheuisiteert ende vertreden: ende du heefste al haer ghedencken verloren.

15

Ende du heefste here vergheuen den heydenen: du heues vergeuen den luden. Bistu niet ghelouet ende ghedanct? Du hebste verlenghet alle die terminen der werlt.

16

Here in haren vernoy so versochten sij di: inden vernoy des beclaghens so is hem dijn leringhe.

17

Ghelike dat een vrouwe die een kint ontfaen heeft als die tijt naect. dat sij roept drouende in haren pijnen: alsoe sijn wij gheworden. Van dijnen aensichte here

18

wi ontfinghen ende wi hebben als ghebaert: ende wi hebben voertbracht den gheest der salicheit. Wi en daden gherechticheit niet inder werlt. hier bij soe en vielen niet die wonen in die werlt.

19

Dine dode sullen leuen: dine ghedode sullen verrisen. Wort wakende ende loeft die woent inden ghemulle. want dou des lichtes is dijn dou. Ende der gyganten lant sultstu nedertrecken inden valle.

20

Ganc mijn volc. ende ganc in dijn bedden: besluyte dijn doeren op di: worde verborgen een luttelkijn. tot dat mijn onwaerdicheit ouerlide.

21

Want siet die here sal wtcomen van sijnre heyligher stat.

[p. *367]

dat hi visiteren sal die boesheit ieghen die wonende is inder aerden: ende die aerde sal ondecken haer bluet: ende sij en sal voertmeer niet ouerdecken haer ghedode.