Bible in duytsche (Delftse bijbel 1477)

§ Ca .xxiiij

1

SIet die here sal dat lant bloten ende salt scheiden: ende hi sal des lants aensicht quellen: ende hi sal verstroyen die ghene die daer in wonen:

2

ende het sal wesen ghelike den volke alsoe die pape: ende ghelike den knecht. also sijn here: ende gelike den ioncwiue: also haer vrouwe. Ghelike den ghenen die coept. alsoe die ghene die vrrcoept: ghelike den wokenaer. alsoe die ghene die ontleent: gheliken dien die maent. alsoe die gene die sculdich is.

3

Want mit scheidinghe sal dat lant worden ghescheiden. ende mit benemynghe salt beroeft worden. Want die here heeft dat woert gesproken.

4

Dat lant weende ende ran nederwaert ende het is vercranct: die werlt liep neder. die hoocheit des volkes vanden lande is vercranct:

5

ende dat lant is verslaghen vanden ghenen dier in wonen: want si hebben die wette te broken: ende dat recht verwandelt: ende si hebben ghescheiden die ewelike belofte.

6

Om dat soe sal die maledictie dat lant verslinden. ende dier in wonen zullen sondigen hier om sullen versotten die dat lant oeffenen: ende daer sullen luttel menschen ghelaten worden.

7

Dat wijngaert lesen weende: die wijngaert is vercanct si versuchten alle die verblijdende waren int herte.

8

Die blijscap vanden tamburen hielt op? Dat geluut der gheenre die verblijden rusten: die sueticheit vander harpe zweech

9

Mit blijscappen en sullen sij ghenen wijn drincken: die dranc sal bitter wesen den ghenen dien drincken sullen.

10

Die stat der ydelheit is vertreden: elc huys is besloten datter nyemant in en gaet.

11

Gheroep sal wesen opten wijn inden straten: alle blijscap is verwoest. die vruechde der werlt is ouergheuoert:

12

in die poorte is ghelaten enicheit: ende keytiuicheit sal die poorten verpletten:

13

want dese dinghen sullen wesen in die middewaert vander waerlt in die middewaert vanden volke Gelike dat luttel olyuen die bleuen sijn gesuuert worden vanden olyue besien: ende die wijnbesien als die wijngaert ghelesen is.

14

So sullen dese haer stemme opheffen ende louen: als die here sal wesen gheglorificeert. so sullen sij neyen vander zee.

15

Om dit so danct den here in leringhen inden eylande der zee den name des heren god van israhel

16

Vanden eynde der werelt hoerden wi den loue des gherechtichs glorie. Ende seide. Mijn heymelicheit is mij mijn heymelicheit is mijn Wee mi Ouerbrekende hebben sij ouerbrakich gheweest. ende mit ouerbrekelicheden van ouerdadighen soe hebben sij ouerbrakich gheweest.

17

Vreze ende putte ende stricke op di die wonende sijs inder aerden.

18

Ende het sal wesen. die vlien sal vanden aensichte der vresen hi sal vallen inden putte: ende die hem ontcommert vanden putte hi sal ghehouden werden mitten stricke. want die regen die gaet vanden hoecheden sijn ondaen: ende die fondamenten vander aerden sullen worden bestoten.

19

Mit brekinge

[p. *365]

sal die aerde ghebroken worden: mit verderuinghe sal die aerde worden verdoruen.

20

Mit beroeringe sal die aerde beroert werden: mit iaghinghe sal die aerde gheiaecht werden als een droncker man: ende si sal worden wech ghedaen als een tabernacule van eenre nacht. Ende haer ongerechticheit salse verzwaren: ende hi sal vallen ende si en salder niet toedoen dat si weder op verstaen sal

21

Ende het sal wesen in dien daghe. so sal die here visiteren op die quaetheit des hemels inden hoghen: ende op die coningen van aertrike die opter aerden sijn.

22

Ende si sullen worden vergadert inder vergaderinghen een bondels inden puel: ende daer sullen sij werden ghesloten in den kerker: ende na vele daghen sullen si werden gheuisiteert

23

Ende die mane sal haer scamen Ende die sonne sal bescaemt worden. als die here vanden scaren regneren sal opten berch van syon ende in iherusalem: ende als hi gheglorificeert sal wesen inden aenscouwen sijnre oudere.