Bible in duytsche (Delftse bijbel 1477)

§ Capit .xxiij

1

BElast van tyrus: sceyet scepen vander zee. want thuys is ghewoest daen dat sij te comen pleghen: vanden lande van sethim. ist hem geopenbaert.

2

Swijghet die woent inden eylande die comenscap van sydonen: die ouer die zee varen si vervuolden dij in vele wateren:

3

dat saet van nylus der riuieren die oext haerre vruchten: ende si is ghemaect der heydene comanscap.

4

Sidon scame dij. Seit die zee ende die starcheit des zees segghende. Ic en ghebaerde niet noch en bracht ne ghene kindere voert. ic en gheuoede ne gene ionghelinghe: noch en volbrochte maghede te haren ghewasse.

5

Alsment horen sal in egipten: so sullense droefheit hebben als sijt horen sullen van tyro.

6

Vaert ouer die zee: bescreit die woent inden eylande.

7

En is hi dit niet die blijscap hadde vanden eersten dagen in haerre outheit. Haer voete sullense verre leiden om pelgrimaedse te doen.

8

Wie pensede dat op tyrum. die wilen gecroent was? Wics comanne waren die princen: ende haer aenvalres die voerbarighe vanden lande.

9

Die here vanden scaren heeft dat ghepenst. dat hi neder trecken soude die houaerde van alre glorien: dat hi ten lachter brenghen soude alle die voerbarighe vanden lande.

10

Dochter der zee lide ouer dijn lant als een riuier: di en is voertmeer ne gene gorderieme

11

Hi heeft sijn hant voert ghesteken bouen die zee: ende heeft die rike verstoert. Die here heuet beuolen ieghen chanaan: dat hi haer starcke vertreden soude.

12

Ende seide. Du en sultster niet toedoen voertmeer dattu verblijden sultste: beclaghinge gedoghende die maghet dochter van sydonen. Stant op ende vaer ouer in sethim: daer en seldi oec ne ghene ruste wesen.

13

Sich dat lant vanden caldeeuschen alsoe ghedaen volc en heeft nye geweest: assur heeftse fondeert. Si leden ouer in gheuanghenisse hare vrome lude. si ondergrouen haer huyse ende si settense in vallen.

14

Bescreit scepe vander zee. want v starcheit is verwoest.

15

Ende het sal wesen: in dien dage sultstu in vergetelheden wesen o tyre tseuenenich iare: als die daghe eens conincs. Na tseuentich iaer. sal tyro wesen als eens lichtes wiues liedekijn

16

Nem mit dij die harpe: ganc die stat om licht wijf die der verghetelheit geleuert biste. Singhet wel: oeffen dat liedekijn: dat dijn ghedencken mach sijn.

17

Ende het sal wesen na tseuentich iaer. soe sal die heer tyrum visenteren. ende hi salse wederbrenghen te haren louen: ende echter selt wesen dat sij comanscap doen sal mit allen riken der werelt

18

ende haer comanscap ende haer loen sullen wesen den here gheheylicht. Men salse niet vergaderen noch si en sullen niet worden opgheleit: want die ghene die voer den here ghewoent heb-

[p. *364]

ben sal haer comanscap wesen dat sij eten sullen in satheden. ende dat sij werden ghecleet totter outheit.