Bible in duytsche (Delftse bijbel 1477)

Ca .xxij

1

DIe last der valeyen des visioens: Want wat is di oeck want du biste alle opghegaen. op die dake

2

vol van gherope: gheoeffende poort. verblijdende stat? Dine versleghene en sijn niet verslaghen mitten zwaerde: noch dijn dode en sijn niet doot inden stride.

3

Alle dijn princen sijn gheulogen te gader: ende si sijn herde ghebonden Alle die vonden waren worden te gader ghebonden. si vloghen van verren

4

Daer om seide ic. gaet wech van mij: ic sal bitterlijc wenen. Ende wilt niet oplegghen. om mi te vertroesten op die woesticheit der dochter mijns volcs.

5

Want die dach der dootslach ende der vertredinghen ende der weninghen riset. vanden scaren in die valeye

[p. *362]

des visioens. Ondersokende die muer ende groot ghemaect opten berch.

6

Ende elam nam den boghe: ende den waghen eens gheredens menschen: die schilt sal ondecken die want.

7

Ende dijn wtuercoren valeye sal wesen vol waghenen: ende die gheredene sullen haer stuelen setten in die poorte:

8

ende dat ouerdecsel van iuda sal worden ondect. Ende du sultste sien in dien dage dat wapen huys van des huus bosschaeldien:

9

ende du sultste sien die scoren van dauids stat: dat sij ghemenichuoudicht sijn. Ende ghi vergadert die watere vander nederster piscinen.

10

ende ghi tellet die huse van iherusalem: ende ghi braect die huyse of om die muer te versekeren.

11

Ende ghi maket enen kuyl tusschen die twe muren. ende ghi vermaket die watere vander oudster piscinen: ende ghi en saget niet ten ghenen diese ghemaect hadde ende den werken daer of en saech di niet van verres.

12

Ende die here god vanden scaren sal roepen in dien daghe ten ghewene. ende ten ghescreye ende ter caluheit. ende ten gordele vanden sack:

13

ende sich hets blijscap ende vroude. te dodene caulere. ende weders te verworghen. vleysche teten ende wijn te drincken. Eten wi ende drincken wij: want morghen sullen wij steruen.

14

Ende is gheopenbaert in mijne oren die stemme des heren vanden scaren. Die ongherechticheit en sal v niet werden verlaten. voer dat ghij steruen sult: seit die here god vanden scaren.

15

Ganc ende ganc in tot hem die woent inden tabernaculen. tot sobnam die prouoest vanden tempel. ende du sultste hem seggen.

16

Wat maecstu hier. of als wie bistu hier? Want tu di een graft hier wtgehouden hebste? Du heueste naerstelijc inden hoghen di wtghehouwen een verdencken in enen steen te dinen behoef een tabernakel.

17

Sich die here sal di wech doen draghen. also men enen verhaenden capoen wech draghet: ende als een omcleet sal hi di opheffen.

18

Cronende sal hi di cronen mit vernoy: als enen bal sal hi di werpen in een wijt ende lang lant. Daer sultstu steruen: ende daer sal die waghen dijnre glorien wesen in lachtere des huys dijns heren.

19

Ende ic sal di wt stoten wt dijnre stacien: ende ic sal di afsetten van dijnen dienste.

20

Ende het sal wesen. in dien daghe sal ic ropen mijnen knecht helyachim helchias sone.

21

ende ic sal hem cleden mit dijnen rock: ende mit dijnen gordel sal icken ghestercken. ende geuen hem dijn macht in sijn handen: ende hi sal wesen als een vader den ghenen die tot iherusalem wonen ende den husen van iuda.

22

Ende ic sal hem gheuen den slotel van dauids huse op sijn scoudere: ende hi sal ontsluyten. ende nyemant en sal wesen diet sluyten sal. ende hi sal sluyten. ende nyemant en sal wesen diet ontsluyten sal.

23

Ende ic sal hem vaste setten enen stake inder ghelouigher stat: ende hi sal wesen in een croen der glorien sijns vader huys

24

ende sullen hanghen bouen alle blijscap van sijns vaders huys. menigherhande manier van vaten: elc cleen vaetken. van bekers vaten

[p. *363]

tot allen vaten van musijken.

25

In dien daghe seit die here vanden scaren. sal wech worden ghedaen die stake die vast gheset was inder getrouwer stat ende hi sal worden te broken ende vallen. ende datter aen hinc sal veruaren: want die here heuet ghesproken.