Bible in duytsche (Delftse bijbel 1477)

§ Ca .xxi.

1

BElast vander ghelatenre zee. Ghelike dat die bedrusche van affriken waert coemen. also comt vander wildernissen: vanden anxteliken lande

2

een hert visioen is mij gheboetscapt. Die onghelouich is. hi duet onghetrouwelijc: ende die een dootslaenre van volke is. hi woest Ganc

[p. *361]

op elam ende belegghe meden: ic heb al haer ghesucht doen cesseren.

3

Daer om sijn mijn lendene veruolt mit rouwe: vernoey heeft mij bezeten: ic ghelike eenre vrouwen vernoey die in arbeide leit. Ic viel ter neder doen ict hoerde: ic wort verstoert doen ict sach

4

Mijn herte versteefde: die donckerheden veruaerden mi Babylon mijn geminde. is mij gheset in een verwonderen.

5

Legghe die tafel: merct inden hoghen scouwene. Ghi etende ende drinckende. staet op ghi princen: begrijpt den schilt.

6

Want dit seit mi die here Ganc ende set enen wachtere: ende soe wat dat hi sien sal dat boetscap.

7

Ende hij sach enen waghen mit tween gheredenen. enen opsitter eens ezels ende een opsittere eens kemels. ende hi mercte naerstelike in vele scouwene.

8

Ende hi riep als ene liebaert. Op des heren wachte bin ic staende eenpaerlijc des daghes. ende op mijn hoede soe ben ic staende alle nachten.

9

Siet die man die opsittere vanden waghene der gheredene quam. Ende seide ende antwoerde. Hets gheuallen hets gheuallen babilonien: ende alle hare afgoden sijn te stucken ghetreden in die aerde.

10

Mijne dorsscheren ende dochter mijns dorscheuloers: die dinghen die ic ghehoert hebbe vanden here vanden scaren gode van israhel dat heb ic v geboetscapt

11

Den last van duma. Tot mi roept hi wt seir Wachtere wat ist vander nacht wachter wat ist vander nacht?

12

Ende die wachter seide. Die morghenstonde ende die nacht coemt. Of ghi suect soe suect. Wort bekeert ende coemt.

13

Die last in arabien. Inden woude suldi des auonts slapen: inden paden van dodanim.

14

Te ghemoete gaende draghet water dien dorst heuet: die woent int lant van zuden. mit tbrode loept den vliende te ghemoete.

15

Want si sijn geuloghen vanden aensichte des zwaerdes. vanden aensichte des zwaerts genaken: dat hem an quam vanden aensichte des ghespannens boghen. vanden aensichte des zwaers strijts:

16

want dit seit die here tot mi. Noch binnen enen iaer als in een iaer des huerkneths. ende alle die glorie van cedar sal wechghedaen worden:

17

ende dat ouerblijue des ghetaels vanden starcken scutters vanden kinderen van cedar sullen worden ghemindert. Want die here god van israhel heuet ghesproken.