Bible in duytsche (Delftse bijbel 1477)

§ Ca .xx.

1

INt iaer dat thartan in asothun quam. doe hem sargon die coninc van assyrien ghesonden hadde. ende hi ghevothten hadde ieghen asothun ende hijt ghewonden hadde:

2

in dien tide sprac die here in ysayas amos soens hant ende seide. Ganc ende ontbinde den sac van dinen lendenen: ende doe af die schuen van dinen voeten. Ende hi dede also: ende ghinc naect ende onghescoeyt.

3

Ende die here heeft gheseit. Alsoe ysayas mijn knecht ghewandert heeft naect ende onghescoeyt. het sal wesen een teyken ende een wonder van drie iaren op egipten ende op ethiophien.

4

also sal die coninc van assirien driuen die gheuangenisse van egipten. ende die oueruoeringhe van ethiophien: den ionghelinc ende den ouden. naect ende onghescoeyt mit ondecten dien te lachtere van egipten.

5

Ende sij sullen bescaemt worden ende ontsien van ethiopien haerre hopen: ende van egipten haerre glorien.

6

Ende in dien daghe sal segghen die ghene die woent in desen eylande. Sich was dit onse hope. daer wij toe vloghen om salcoers: dat si ons verlossen soude van des conincs aensichse van assyrien? Ende hoe sullen wijs moghen ontvlien?