Bible in duytsche (Delftse bijbel 1477)

§ Capittel .xix.

1

DEn last van egipten. Siet die here sal climmen op een lichte wolke ende hi sal in egipten comen: ende die afgode van egipten sullen worden beruert van sijnen aensichte: ende dat herte van egipten sal amachtich worden in midden hem.

2

Ende ic sal die van egipten doen te gader lopen ieghen die van egipten: ende een man sal vechten ieghen sijnen brueder. ende een man iegen sijnen vrient: ende die een stat ieghen die ander stat. ende dat een rike ieghen dat ander rike:

3

ende die gheest van egipten sal worden ghescoert in haren binnensten. ende ic sal horen raet auerecht werpen: ende sij sullen vraghen haren afgoden. ende haren waersaghers. ende haren phitonen. ende haren gheraders:

4

ende ic sal egipten leueren in wreder heren hant: ende een starc coninc sal hebben heerscappie ouer hem. seit die here vanden scaren.

5

Ende dat water vander zee sal verdroghen. ende die riuiere sal worden bedroeft ende verdroecht:

6

ende die riuieren sullen ghebreken. Ende verdunt worden ende verdroecht werden ende die beken der hoeuelen. Dat riet ende die biesen sullen verdroghen.

7

die gront vander beken sullen worden bloot van hare fonteinen. Ende alle verversschet ghesaeit saet sal worden droghe ende verdroghen. ende en sal niet wesen

8

Ende die visschers sullen droeuen: ende alle die hinghel in die riuier werpen. sullen wenen: ende die dat nette wtspreiden op dat aensicht der watere sullen verdorret worden.

9

Die dat vlas werken sullen bescaemt worden: die breide ende weuen ubtile dinghen.

10

Ende haer veruerschede houe sullen wesende verdroghende: ende alle die maecten voghelaers netten om die visschen te vaen.

11

Die sotte princen van thaneos: pharaons wijse raetgheuers sij gauen enen onwisen raet. Hoe suldi moghen segghen pharaone. ic bin der wijser kint: kint der ouder coninghe?

12

Waer sijn nv dijn wise lude? Si boetscapten ende segghen di wat die here vanden scaren gepenst heeft op egipten.

13

De princen van thaneos sijn sot gheworden: die princen van mempheos sijn verdroget: sij hebben egipten bedroghen. den hoec van haren volcken.

14

Die here minghede in die middewaert van egipten den gheest der drayachticheit: ende sij deden egipten dolen in al haren werken: alsoe een droncken ende een rasende doelt

15

Ende egipten en sal wesen ne ghene werc dat maken sal: dat hoeft ende den staert den crommenden ende den verbreidelden.

16

In dien daghe sal egipten wesen als wijuen: ende si sullen verwonderen: ende sullen hem ontsien van den aensichte der beroeringen der hant des heren vanden scaren. die hi beruert heeft op haer:

17

dat lant van iuda sal egipten wesen in anxte. Elc die haers gedencken sal. sal hem veruaren vanden aensithte des raets des heren vanden scaren: dat hi op haer heeft ghepenst.

[p. *360]

18

In dien daghe sullen vijf steden wesen inden lande van egipten. die spreken sullen die tonghe van chanaan: ende zweren sullen biden here vanden scaren. Die een sal heeten die stat der sonnen.

19

In dien daghe sal des heren outare wesen in midden den lande van egipten: ende des heren tytel neuen haer eynde:

20

ende desen outaer sal wesen in enen teyken ende in een oercondscap den here vanden scaren inden lande van egipten. Want sij sullen roepen ten here vanden aensichte des geens diese quelt ende hi sal hem senden enen behouder ende enen voervechter diese verlossen sal.

21

Ende die here sal worden bekent van egipten. ende die van egipten sullen den here bekennen in dien daghe: ende sij sullen oeffenen in offerhanden ende in ghiften: ende si sullen beloften belouen den here ende gheldense.

22

Ende die here sal egipten slaen mit eenre plaghe ende hi salse ghenesen: ende die van egipten sullen werden bekeert ten here: ende hij sal hem ghepayst werden ende hi salse ghenesen.

23

In dien daghe sal een wech wesen van egipten in dien van assirien: ende die van assirien sal comen in egipten. ende die van egipten in assyrien:: ende die van egipten sullen dienen den coninc van assirien.

24

In dien daghe sal israhel wesen die derde naden mensche van egipten. ende van assirien benedictie in midden den lande.

25

dat die here vanden scaren ghebenedijt heeft segghende. Ghebenedijt sij mijn volc van egipten: ende dat werc mijnre hande dien van assyrien: mer mijn erfachticheit is israhel.