Bible in duytsche (Delftse bijbel 1477)

§ Capittel .xviij.

1

WEe den lande mitter cymbalen vanden vloghelen dat ouer die riuier van ethiophien is:

2

die messelgiers sent in die zee: ende in vaten van papiere bouen den wateren. Gaet haestelijc ghi enghelen. totten wtghestoten luden ende ghescoert: ten veruaerliken volken vanden welken gheen ander en is. den verbeidenden luden ende vertreden: wies lant die riuieren roefden. ten berghe des namen des heren vanden scaren ten berghe van syon.

3

Ghi alle die in die werelt woenachtich sijt. als opuerheuen sal sijn inden berghen een teyken soe suldijt sien: ende ghij sult horen dat gheluut vander trompen:

4

want dit seit die here tot mij. Ic sal rusten ende ic sal merken in mijne stat: alsoe dat licht vanden middaghe claer is: ende als die wolken vanden douwe inden dage des ouxtes.

5

Want voer den ouxt so ist al ontbloeyt. ende onripeghe volmaectheit sal groeyen: ende sijn telgherkijn sullen worden of ghecort mit crommen messen. ende dier ghelaten sullen worden sullen werden afghesneden.

6

Ende sij sullen wtghedaen werden. ende te gader werden gelaten den voghelen der berghe ende den beesten der aerden: ende mit eweliker hetten sullen op hem wesen die voghelen: ende alle die beesten vanden lande sullen op hem horen winter doen

7

In dien dage sal ghiften worden gebracht den here vanden scaren vanden wtghestotenen volke ende doer scoert: vanden veruaerliken volke na dat welcke

[p. *359]

gheen ander en is: vanden onbeyende volc. doende ende ontbeidende: wies lant die riuieren roefden: ter stat des namen des heren vanden scaren ten berghe van syon