Bible in duytsche (Delftse bijbel 1477)

§ Capittel .xvi.

1

HEre sende wt een lam dat die heerscappie heuet bouen der werelt: vanden steen der wildernissen ten berghe der dochter van syon

2

Ende moab sal wesen. als een vliende voghel. ende als ionghe die vanden neste vlieghen: alsoe sullen moabs dochteren wesen in dat ouergaen van arnon.

3

Aenganc raet. bedwinghe den raet: sette als den nacht dine scaduwe in middaghe. Verberge die vliende: ende die vluchtighe en wroghe niet.

4

Bi di sullen wonen mijne vluchtighe. Moab wes haer sculaedse van des woesters aensichte. Want dat ghemul is gheeyndt: ende die key-

[p. *357]

tijf heuet eynde ghenomen: hi is te broken die dat lant vertreet

5

Ende die troen sal worden bereet in ontfermicheden: ende hi sal daer op sitten in waerheyden in dauids tabernakel: vonnissende ende vonnes vraghende. ende haestelijc gheldende dat gherecht is.

6

Wij hebben moabs houaerdicheit gehoert hi is harde houaerdich. Sijn houerdicheit ende sijn ouermoedicheit ende sijn onwarrdicheit: is meerre dan sijn starcheit.

7

Hier om sal moab screyen: te moab waert sal al moab hulen Segt sine plaghen den ghenen die verblijden op die mure vanden ghebackenen stenen:

8

want die buyten lande van esebon sijn woest. Ende den wijngaert van sabama. die heren vanden luden hebben sij afghehouwen. Sine gheeselen sijn ghecomen tot iasar: sij doelden inder wildernissen: sijne rancken sijn ghelaten. sij sijn ouer die zee gheuaren.

9

Op dit quaet sal ic screyen inden gheween van iasar ende wijngaert van sabama. Ic sal dit veruollen mit mijnen tranen esebon ende eleale: want op dijn wijngaert lesen ende op dijnen ouxt is gheuallen die stemme der gheenre diene treden.

10

Ende vrueghede ende blijscap sal worden ofghenomen vanden carmelo: ende hi en sal inden wijngaerden niet verblijden noch vervrouden. Hi sal die wijn in die wijnpersse niet treden dien plach te treden: ic heb wech ghedaen die stemme der tredenre.

11

Op dat sal mijn buuc te moab waert luden als een harpe: ende mijn binnenste ter muere waert van ghebacken coreelen.

12

Ende het sal wesen. als moab openbaren sal dat hi ghearbeit heeft op sijne hoecheden. so sal hi ingaen tot sijnen heylighen om te bedene. ende hi en sals niet vermoghen

13

Dit is dat woert dat die here gesproken heeft te moab van doe.

14

ende nv soe heeft die here ghesproken segghende. In drien iaren als eens huerknapen iaer. soe sal moabs glorie worden ofghenomen op alle vele volcs: ende in hem sal ghelaten worden als een wijndruue cleyne ende luttel. ende niet vele