Bible in duytsche (Delftse bijbel 1477)

§ Capittel .xiiij

1

HEt ysser bij dat sijn tijt comen sal. ende sijn daghe en sullen niet werden verlanghet. Want den here sal iacobs ontfermen ende hi sal noch wtverkiesen van israhel: ende hi salse doen rusten op haer lant. Ende die toecomelinc sal tot hem toegheuoghet worden: ende hi sal hem houden aen iacobs huys

2

Ende die volken sullense houden: ende si sullense leiden tot haerre stat. Ende thuys van israhel salse besitten op ons heren lant in knechten ende in ioncwiuen: ende si sullen sijn vaende. die ghene die hem vinghen: ende sij sullen haer bescatters tonder doen.

3

Ende het sal wesen. in dien daghe als di god vrede gegheuen heeft van dinen arbeide. ende van dinen bestotinghe. ende vanden herden dienste daer du mi te voren mede dienst:

4

soe sultstu dese parabole nemen ieghen den coninc van babilonien ende segghen. Hoe ghecesseerde die bescatter. ende hoe gerustede die tribuut?

5

Die here heeft der ongenadigher stoc te broken.

6

die de volke sloech in onwaerdicheden mit rueden der heerscappien mit ongheneseliken wonden: dien die heydene tonder dede in toerne: diese fellijc persequeerde.

7

Alle dat lant ruste-

[p. *355]

de ende zweech. si verblijde ende sal vervroeyen:

8

die vuyren boem oec werden op di verblijt. ende die cederen vanden libano. Van dier tijt dattu slaepste so en quam hi niet op die ons ofhouwen mach.

9

Die helle wort onder verstoert inden ghemoete dier toecoemst so verwecte hi die gygante alle die princen vanden lande. Stonden op van haren ceedzen alle die princen vanden gheslachteu:

10

si sullen alle antwoerden ende dij segghen. Du biste oec ghewont alsoe wi sijn: du biste ons gelike gheworden

11

Dine houaerdicheit is neder ghetogen totter hellen: dijn croendie is mede te neder gheuallen. Onder di sal motte ghestroyt worden: ende dijn ouerdecsel sullen wesen worme.

12

Hoe gheuielstu vanden hemel lucifer die vroech oprees? Hoe gheuielstu inder aerden dien die heydene wondes:

13

die seitste in dijn herte. Ic sal opvaren inden hemel. bouen den sterren des hemels sal ic mijnen troen verheffen: ic sal sitten inden berge des testaments. inden hornekens van noerden.

14

ic sal opvaren bouen die hoecheit der wolken. ic sal ghelike wesen den hoechsten.

15

Mer nochtan sultstu werden neder ghetoghen ter hellen. in diepheit des cuyls.

16

Die di sien sullen. si sullen te di waert neder neigen: ende si sullen dij scouwen segghende. En is dit die man niet die dat lant verstoerde: ende die die riken bestiet:

17

die die werlt woest ghemaect heeft. ende haer poorte ghedestrueert? Hi en opende sijnen geuanghen niet den kerker.

18

Alle coninghen der heidene alle sliepen si in glorien elke in sijnen huse:

19

mer du biste wtgheworpen wt dijnen graue als onnutte dorricheit die aen die wortel wast. als die mit attere besmet biste ende bewonden mit dien die doot gheslaghen sijn mitten zwaerde: ende die neder gegaen sijn ten fondamenten vanden cuyl. Als een vuyle croengie

20

so en sultstu en gheen ghezelscap hebben: noch mit hem wesen int begrauen. Want du hebtste dijn lant verderft: du hebtste dat volc doot gheslaghen. Men sal nemmermeer roepen saet der alre quaetster.

21

Bereit sijn kinder ter dootslacht: die ongherechticheit haerre vaderen. Si en sullen niet weder opstaen: noch in erfachticheden besitten dat lant: noch veruollen dat aensicht der rontheit vander stat

22

Ende ic sal opstaen bouen hem seit die here vanden scaren: ende ic sal verliesen den name van babilonien ende die ouerblijue. ende dat gheslachte ende dat saet seit die here.

23

Ende ic sal babilonien setten in des zwaerts possessie: ende in wacke broecke van wateren. ende ic salse keren inden besem wriuende seit die here vanden scaren

24

Die here vanden scaren heeft ghesworen segghende. Oft niet alsoe wesen en sal also ic meende. oec alsoe ict mitter herten ghepenst hebbe

25

ende alsoe salt geschien: dat ic vertreden sal die van af syrien in mijnen lande. ende inden berghen sal icken verteden: ende sijn ioc sal van hem werden ghenomen: ende men sal sijn last ofnemen van haren scouderen.

26

Dit is die raet die ic ghepenst hebbe op alle dat lant: ende dit

[p. *356]

is sijn voertsteken hant op allen luden

27

Want die here vanden scaren heuet beuolen: ende wie salt moghen benemen? Ende sijn hant is voertgesteken: ende wie salse afkeren?

28

Inden iare daer in doot was die coninc achas. soe wort dit last ghedaen.

29

En verblijde di niet du al philistia: want die ruede dijns slaenres is verwandelt. Want wt der slanghen wortel so coemt een kokentrijs: ende sijn saet sal sijn verslindende den voghel.

30

Ende der armer eerstgeboerne sullen worden gheuoedet. ende die arme sullen betrouwelijc rusten: ende ic sal in hongher doen verderuen dijn wortel: ende ic sal dine ouerblijue doden.

31

screy poorte. roep stede: alle die stat van philistia is ter neder gheworpen. Want van noerden sal roec comen ende nyemant en is die ouerblijuen sal sijnre scare.

32

Ende wat antwoertmen der luder boden? Want die here heeft sion ghefondeert: ende in hem sullen hopen die armen sijns volcs.