Bible in duytsche (Delftse bijbel 1477)

§ Capittel .xiij.

1

DIe last vau babilonien: dat ysaias sach amos sone

2

opten donckerachtighen berch heft op een teyken: ende verheft op die stemme. heft op die hande: ende sij comen in binnen den poorten van babilonien.

3

Ic heb ontboden mijnen gheheylichden. ende heb gheropen mijn starcke in mijnre gramscap: die verblijdende sijn in mijnre glorien

4

die stemme eenre menichten inden berghen als van aernsten volken: die stemme des gheluuts der coninghe van vele heydene. Die here vanden scaren die heeft beuolen den ridderscap des strijts.

5

die comen van verren lande. Vanden eynde des hemels die here ende die vate sijns torens: om te verderuene alt lant

6

Screyt want des heren dach is bi: want hi sal comen als woesticheit vanden here.

7

Om dit sullen alle handen worden ontbonden: ende alle menschen herte sal amachtich wesen

8

ende sal worden bedroeft.Si sullen hebben pijne ende zweringen: si sullen pijne hebben als vrouwen die in arbeide legghen.Yghelijc sal verwonderen tot sijnen brueder waert Verbrande aensichten sullen haer aenschine wesen.

9

Siet des heren dach sal comen vol van wreder onwaerdicheden ende oec van gramscappen ende van toerne: om dat lant te legghen in woesticheden. ende om te verderuen die sondaren vanden lande:

10

want die sterren des hemels ende haer claerheit en sullen niet wtspreiden haer licht. Die sonne is verdonckert in haer oprisen: ende die mane en sal niet schinen in haren lichte.

11

Ende ic sal visiteren op die quaetheden der werlt: ende ieghen

[p. *354]

die onghenadighe haerre ongerechticheden. Ende ic sal doen rusten der ongelouigher haer houaerde: ende ic sal vernederen die hoechdragentheit der starcker.

12

Een man sal precioser wesen dan gout: ende een mensche precioser dan ghesuuert gout.

13

Hier op sal ic den hemel verstormen. ende die aerde sal worden beruert van haerre stat: om die onwaerdicheit des heren vanden scaren. ende om den dach sijns torens.

14

Ende sij sal sijn als een ghescoren scaep dat vliet. ende als een voghel: ende nyemant en sal wesen diese vergaderen sal Ygelijc sal wederkeren tot sijnen volke. ende elc sal vlien tot sijnen lande waert.

15

Ende alle die ghuonden worden sal. die salmen dootslaen: ende elc die daer opcomen sal. hij sal vallen inden zwaerde

16

Haer kijnderkijn sullen doot ghestoten worden in haren oghen: men sal haer huse rouen: ende haer wiue salmen vercrachten

17

Siet ic sal op verwecken die van meden. die gheen siluer en soken noch gout en willen:

18

mer si sullen mit ghescutten die cleyne kinderkine doden ende si en sullen niet ontfermen die kinderkijn die den buuc sughen: ende opden kinderen en sal haer oghe niet sparen.

19

Ende babilon die gloriose stat die voerbarich is inden riken: inder houerdicheit dier van caldea sal wesen auerecht gekeert: also god keerde auerecht sodomam ende gomorram.

20

Men sal daer binnen niet wonen tot in dat eynde: men salse niet stichten totten gheslachte ende gheslachte. Noch die man van arabien en sal daer sijn tente niet setten: noch die herden en sullen daer niet rusten:

21

mer daer sullen die beesten rusten: ende haer huse sullen werden veruolt van draken. Ende daer sullen wonen struzen ende wilde mannen sullen daer springhen:

22

ende daer sullen in haren husen antwoerden die vlen: ende mareminnen in die husen der vuylre weeldicheit.