Bible in duytsche (Delftse bijbel 1477)

Ca .x

1

WEe die setten ongherechtighe wette.ende die scriuen die screuen der ongherechticheden:

2

om dat sij die arme tonder doen souden inden oerdel ende dat sij cracht doen souden der saken der oetmoedighe mijns volcs: om dat weduwen hoer proye wesen souden. ende dat si die weesen roeuen souden

3

Wat suldij doen inden daghen der visyteringhen ende der ellendicheit die van verren comt? Te wines hulpen suldi vlien ende waer suldi laten uwe glorie:

4

en bughet v niet onder bant. dat ghi en valt mitten genen die versleghen sijn? Op alle desen so en is sijnen toren niet afghekeert: mer noch is sijn hant wt ghesteken.

5

Wee du assur Roede mijnre gramscap ende stoc hi ist. In hare hant mijne onwaerdicheit.

6

Ic sallen senden ten bedriechliken volke. ende ieghen dat volc mijns torens sal ic hem beuelen: dat hi die roue wech doe ende die proeye deile: ende dat hij dat volc sette in een vetreden als die moddere vanden straten.

7

Mer hi en sal dus niet worden gheacht. ende hij en sal sijn herte also niet micken: mer sijn herte sal wesen te vertredene: ende ter dootslaht niet van luttel luden.

8

Want hi sal seggen.

9

En sijn niet mijne princen oec mede coninghen? En is niet als carchamis alsoe thalamno:: ende arphat also oec emach? En is niet als damascus alsoe oec samaria?

10

Alsoe gheuant mine hant die riken des afgods? Also oec vantse haerre beelden diere van iherusalem ende van samarien.

11

Alsoe ic ghedaen hebbe samarien ende hare afgoden: en sal ic oec niet doen also iherusalem ende haren beelden?

12

Ende het sal wesen als die here voldoen sal alle werken inden berghe van syon ende in

[p. *351]

iherusalem. soe sal ic visiteren op die vruchte vander groter herten des conincs van assur: ende op die glorie der hoecheit van sijnen oghen.

13

Want hi heuet gheseit. Ic hebt ghedaen inder starcheit mijnre hant: ende in mijnre wijsheit heb ict verstaen. Ende hebbe wech ghedaen der volke termijn: ende haer princen heb ic gheroeft: ende als een machtich man heb ic neder ghetoghen die inden hoghen saten.

14

Ende mijn hant heuet vonden als een nest die starcheit der volken: ende alsoe men vergadert die eyere die ghelaten sijn. also hebbe ic alle dat lant vergadert: ende nyemant en was die den vloghel ieghen mi ruerde of den mont ontdede ende gheluyt gaf.

15

En sal haer een aex niet verbliden ieghen den ghenen dier mede houwet ofte en sal haer een zaghe niet verheffen ieghen den ghenen daer si of ghetrocken wort? Also ofte een ruede verheuen worde ieghen den ghenen diese opheft: ende als een stoc worde opuerheuen die oec hout is.

16

Om dit sal die here vanden scaren die bouen al heer is senden in sijnen vetten vermaghertheit. Ende onder sijn glorie so sal ontsteken brandachticheit ende bernen als vyer.

17

Ende tlicht van israhel sal wesen in vyer ende sijn heylich sal werden barnende in vlammen: ende sijn doren sal werden verslint ende die bramen in enen dage:

18

ende die glorie sijns bossches ende sijns wouts sal werden verteert vander zielen totten vleysche. Ende hi sal wesen van anxte vluchtich:

19

ende dat ouerblijuen vanden bussche sijns houts sullen worden ghetelt om die luttelheit: ende een kint salt scriven.

20

Ende het sal wesen. in dien daghe soe en sal dat ouerblijf van israhel niet daer toedoen Ende die ghene die geulouwen sijn van iacobs huse te leuen optengenen diese slaet: mer si sal leuen opten heylighen here van israhel

21

Inder waerheit so sullen die ouerblijue bekeren. Die ouerblijue seg ic van iacob totten starcken here.

22

Want ist dat dijn volc van israhel is als dat sant vander zee: dat ouerblijuen van hem luden sullen bekeert worden. Dat ghecorte voleynde. sal die gerechticheit suueren.

23

Want voleynden ende vercortten sal doen die here god vanden scaren in die middewaert van alle der werlt.

24

Om dit so seit dit die here god vanden scaren. En wil niet ontsien mijn volc dat woenste in syon van assur. Want in eenre rueden sal hi di slaen. ende hi sal sijnen stoc op heffen ieghen di inden wech van egipten.

25

Want noch al luttel ende al luttelkijn ende mijn onwaertscap sal worden geeyndet. ende mijn toerne op haer quaetheit.

26

Ende die here vanden scaren sal op hem verwecken een gheesel nader plaghen van madyam inden steen van oreb: ende sijne ruede op die zee: ende hij salse opheffen inden weghe van egipten

27

Ende het sal wesen. in dien daghe so sal sijn last ofghedaen worden van dijnre scouderen: ende sijn ioc van dinen halse: ende dat ioc sal verrotten vanden aensicht der olyen.

28

Hi sal comen in ayoth hi sal haestelijc ouerliden in magron Te magmas sal hi beuelen sine vaten

[p. *352]

29

Si leden haestelijc: ouer gabaa is onse stoel. Rama verwonderde: saulis gabaath vloech.

30

Dochter van gallim neye mit dijnre stemme: verstant laysa arme anathot.

31

Medemena is ouergeuaeren: die woent in gebin wort starc.

32

Noch is die dach: datmen in nob staen sal. Hi weynde sijn hant opten berch der dochter van syon. opten houel van iherusalem.

33

Siet die here. is bouen al die here vanden scaren sal breken die cruke in anxte: ende die hoghe sullen sijn van maecsele sullen worden afghehouwen: ende die hoghe sullen werden vernedert.

34

Ende die dicheden vanden woude sullen worden omgheroet mit yser: ende die libanus sal vallen mitten hoghen cederen.