Bible in duytsche (Delftse bijbel 1477)

§ Capittel .ix

1

TEn eersten tide wort verlicht dat lant van sabulon ende dat lant van neptalim: ende ten lesten tiden wort verswaert den wech der zee ouer die ioerdane van galilea der heydene.

2

Dat volc dat wandelde inden donckerheden sach een groot licht: den ghenen die woende inden lantscapen der scaduwen des doots hem verrees een licht

3

Du hebtste menihuoudicht den heyden: ende niet groot ghemaect haer blijscap. Si sullen voer di verblijden als die ghene die verbliden inden ouxte: alsoe vervrouden die verwinres als sij den roef verwonnen hebben als sij den roef deylen.

4

Want dat ioc sijns lastes. ende die rueden sijnre scouderen ende dat ceptrum sijns taxerers heefstu verwonnen: als inden daghe van madian

5

Want alle ontcrachte roef is mit gheruchte ende dat cleet dat ghemenghet wort mit bluede sal wesen in verbranden: ende spijse des vyers

6

Want een cleyne kint is ons gheboren ende die sone is ons ghegheuen. Ende die princelicheit gemaect op sine scoudere: ende sijn name sal worden gheheten te verwonderene. raetgeuere. god starc. vader vander toecomender werelt. prince des pays.

7

Sine moghentheit sal worden ghemenichfoudicht. ende sijns paeys en sal geen eynde wesen: hij sal sitten op dauids troen ende op sijn rike: om dat hi dat verseekeren sal ende ghesterken in vonnisse ende in gerechticheden van nv voert tot inden eweliken. Die minne des heren vanden scaren sal dit doen.

8

Die here sende een woert in iacob: ende het viel in israhel.

9

Ende alle dat volc van effraym salt weten. ende die wonen in samarien in houerden ende in grootheden der herten seggende.

10

Die quarele sijn gheuallen. mer wij sullen mit viercanten stenen stichten: si hebben die onvruchtighe vigheboem ofghehouwen: mer wij sullense in cederen verwandelen.

11

Ende die here sal rasins viande bouen hem verheffen. ende sijn viande sal ingheruchte verkeren.

12

syrien van oesten ende philistijm van westen: ende si sullen israhel verslinden mit alden monde. In alle desen soe en is sijnen toerne niet afghekeert: mer noch is sijn hant wtghesteken.

13

Ende mijn volc en is niet wedergekeert ten ghenen diet slaet: ende si en versochten niet den here vanden scaren

14

Ende die here sal verderuen van israhel dat hoeft ende den staert: den bockenden ende den verbreidelenden in enen

[p. *350]

daghe.

15

Die langheliuighe man ende die eersame hi is dat hoeft: ende die prophete die leert loghene hi is die staert.

16

Ende het sullen wesen die dit volc salich willen segghen bedrieghende: ende die salich werden si sullen wesen auerecht gheworpen.

17

Om dit en sal die here en ghene ghenoechte hebben op sijne ionghelinge: ende hij en sal niet ontfermen sijnre weesen ende sijnre weduwen. Want elc is ypocrite ende scalc: ende alle mont heeft ghesproken sotheit. In allen desen so en is sijn toren niet ofghekeert. mer noch so is sijn hant voert wtgesteken. Ende dat volc en is niet bekeert tenghenen diet slaet.

18

Want die onghenadicheit is ontsteken als een vyer: ende die brame ende die doerne sullense verslinden. Ende si sal werden bernende in die dickicheit des bussches: ende si sal worden bewonden in die houaerde des roecs.

19

In die gramscap des heren vanden scaren sal dat lant verstoert wesen ende dat volc sal wesen als spise des vyers. Een man en sal sijnen brueder niet sparen:

20

ende hi sal hem afkeren ter rechter siden ende hi sal hongher hebben ende hi sal eten ter slinckerziden ende niet werden ghesaet. Een yghelijc sal verslinden dat vleysh sijns arms: manasses effraym ende effraym manassen. ende sij beide ieghen iudam.

21

In al desen en is sijn toren niet afghekeert: mer noch is sijn hant wtghesteken.