Bible in duytsche (Delftse bijbel 1477)

§ Capittel .viij.

1

ENde die here seide tot mi Nemdi enen groten boec ende scrijf daer mit eens menschen griffien: haestilijc trec neder die roue: roue haestelijc

2

Ic nam mit mi ghetrouwe oerconden: vriam den priester: ende sacharyam barachies sone.

3

Ende ic ghinc tot eenre prophetinnen: ende sij ontfinc ende ghebaerde enen sone.Ende die here seide tot mi Hete sijnen name. haeste trect neder die roue. haeste dij te rouen:

4

want eert kint sal connen roepen sijnen vader. ende sijnre moeder: so sal wech ghedaen worden die starcheit van damasco ende den roef van samarien voerden coninc van assyrien.

5

Ende die here deder toe te mij te spreken segghende.

6

Om dat dit volc ofgheworpen heeft dit water van syloe: die gaen mit gheswighe heymelijc: ende heeft meer aenghenomen rasin ende romelien sone:

7

om dat. siet soe sal die here toebrenghen starcke ende vele watere der riuieren: den coninc van assyrien ende al sijne glorie. Ende hi sal opcomen op alle haer beken: ende sal vloeyen op alle haer oueren:

8

ende hij sal gaen doer iudam oueruloeyende: ende ouerlijdende sal hi comen totten halse. Ende die wtstekinghe sijnre vloghele sal wesen veruollende die wyde dijns lants o emanuel.

9

Wort vergadert gi volc. ende ghi sult verwonnen worden: ende hoert alle landen van verren Wort starc ende ghi sult worden verwonnen: ommegordet v ende ghi sult verwonnen worden.

10

aengaet raet ende hij sal worden ghescheiden: spreect een woert ende ten sal niet gheschien: want mit ons is god

11

Want dit sprac die here tot mij. Alsoe hi in starcker hant mi leerde: dat ic niet gaen en soude indes volcs wech seggende.

12

En segt niet te gader zweringhe. Want al dat dit volc spreect is te gader zweringhe. Ende des volcs vrese en ontsiet niet: noch en vreeset.

13

Den here vanden scaren die heylicht. Ende hi si v ontsien ende v anxt:

14

ende hi sal v wesen in een heylighen: mer hi sal wesen in enen steen aen te stotene ende in enen steen van verbelghene den tween husen van israhel: in een stricke ende in vallen den ghenen die wonen in iherusalem

15

Ende vele van hem luden sullenre hem aenstoten: ende si sullen vallen ende werden vertreden: ende sullen werden ghebonden ende werden gheuaen.

16

Bindet die oercondscap teykent die wet in mijnen iongheren.

17

Ende ic sal den here ontbeiden die sijn aensicht verborgen heeft van iacobs huyse: ende ic sal nae hem ontbeiden.

18

Siet ic ende mijn kinderen die mij die here ghegeuen heeft in een teyken ende in een wonder israhel. vanden heere vanden scaren die woent inden berch van syon.

19

Ende als si segghen sullen tot v. vraghet vanden phitonen ende vanden waersagers die studeren in haren touerien. En sal

[p. *349]

dat volc niet vraghen van sijnen gode visioen ouerleuende ende ouer dode?

20

Mer meer aen die wet ende aen die oercondscap. Ende ist dat sij niet en segghen na desen woerde. soe en sal hem ne gheen morghenstonde licht wesen

21

Ende het sal ouerliden doer dat lant ende dat volck sal vallen ende hongher hebben: ende alst hongher hebben sal so salt gram worden: ende het sal vloken sijnen coninc ende sijnen god. Ende het sal opwaert scouwen

22

ende het sal ter aerden waert sien: ende sich tribulacie ende donckerheden. ende anxt ende torment ende donckerheden quellende: ende hi en sal niet moghen wech vlieghen van sijnen pijnen