Bible in duytsche (Delftse bijbel 1477)

Ca .vi

[p. *346]

1

INt iaer dat die coninc ozias doot was soe sach ik den here sitten op en hoghen troen ende op uerheuen: ende dat hyus was vol sijnre moghentheit. ende die dinghen die onder hem waren veruolden in den tempel.

2

Serphinnen stonden bouen den troen: ses vloghelen waren den enen: ende ses vloghelen den anderen. Ende mit ten tween bedecten si sijne voeten: ende mitten tween voghelen bedecten sij des heren aensicht: ende mitten tween vloghen sij.

3

Ende si riepen deen den anderen: ende seiden. Sanctus scuns sanctus dominus deus excercituum: plena est omnis terra gloria eius. Dat beduut aldus heylich heylic heylich heer god vanden scaren: al dat lant is vol van sijnre glorien.

4

Ende die bouen welfhoute vanden herren worden beruert vanden lude des gheroeps: ende thuus wort veruolt van roke.

5

Ende ic seide. Wee mij want ic had ghezweghen: want ic bin een besmet man van lippen. ende ic wone in midden den volke dat besmetten lippen heeft: ende ic heb den coninc den heer vanden scaren ghesien mit mijnen oghen.

6

Ende een vanden seraphinnen vloech te mi ende in sijn hant was een cole die hi mit eenre tanghen ghenomen hadde vten outaer:

7

ende hi ghenaecter mijnen mont mede ende hij seide. Sich ic heb hier mede dijne lippen ghetast: ende dijne ongherechticheit sal van di werden ghedaen: ende dijne sonde sal worden ghesuuert.

8

Ende ic hoerde des heren stemme die seide. Wien sal ic senden: ende wie salre ons gaen? Ende ic seide. Siet ic bin hier: sende mi.

9

Ende hi seide. Ganc: ende du sultste desen volc segghen. Hoert ghi horende ende en wiltes niet verstaen: ende siet visioen ende wiltes niet bekennen.

10

Verblinde des volcs herte ende versware sijn oren: ende slutet sijn oghen. dat machschien haer oghen niet en sien: ende horen mit sijnen oren. ende verstaen mit sijnre herten: ende dattet worde bekeert ende dat ict ghenese.

11

Ende ic seide. Hoe langhe heer? Ende hi seide Tot dat die steden sullen worden verwoest sonder yemant die daer in wonen sal: ende dat die husen sullen wesen sonder menschen. Ende dat lant sal worden ghelaten woest:

12

ende die here sal die menschen verre doen. Ende hi sal worden ghemenichfoudicht die ghelaten was in midden dat lant.

13

Ende sal worden bekeert ende noch salre in sijn vertienden. Ende si sal sijn in vertoeninghe als die therebinthus: ende als een eike die haer telghere wt spreit. Het sal heylich saet wesen dat. dat inden lande sal blijuen staende.