Bible in duytsche (Delftse bijbel 1477)

§ Capit .iij.

1

WAnt siet die here vanden heren die heer is bouen al sal wechdoen van israhel ende van iuda den vromen ende den starcken: ende alle starcheit vanden brode. ende alle starcheit vanden watere:

2

ende den starcken ende den man den stridere ende den rechter: ende den propheet ende den voersaghere ende den ouden man:

3

ende den prince bouen vijftich man. ende den eersamen van aensichte.. ende den raetsman. ende den wisen die gheoeffent is in die wet: ende den vroeden man der gheesteliker spraken

4

Ende ic sal kinder gheuen hem te princen. Ende onmachtighe sonder ioc sullen heerscappie bouen hem hebben.

5

Ende dat volc sal vallen die man an die man ende elc aen sijnen naesten. Dat kint sal gherucht maken ieghen den ouden man ende die onedel ieghen den edelen.

6

Want een man sal begripen sijnen brueder sijns vaders huysman: ende segghen. Di is een cleet: du sultste wese onse prince: want dese val is onder dijn hant

[p. *343]

7

Hi sal antworden in dien daghe ende segghen. Ic en bin gheen medecijn: ende in mijn huys en is gheen broot noch cleet. En wilt mi niet setten prince des volcs.

8

Want iherusalem is gheuallen ende iudas is mede gheuallen: want haer tonghen ende haer vindinghen sijn iegen den here: dat sij verporren souden die oghen sijnre moghentheit.

9

Dat bekennen haers aenschijns sal hem antwoerden: ende sij predicten haer sonden als sodoma: ende en verborghense niet. Wee haerre zielen: want hem sijn quade dinghen weder ghegheuen.

10

Segt den gerechtigen want hem sal wel sijn: want hi sal eten die vrucht sijnre vindinghen

11

We den onghenadigen in quade. Dat loen sijnre handen sal hem gheschien

12

Mijn volc hebben gheroeft gheweest van haer dwinghers: ende die wiue hebben heerscappie bouen hem ghehadt. Mijn volc die di salich segghen die bedrieghen di: ende si scheiden den vech dijnre ghanghe.

13

Die here staet om te oirdelen: ende hi staet om te oirdelen den volke.

14

Die here sel ten oirdel comen: metten ouders sijns volcs ende met sinen princen. Want ghi hebt ghearghert minen wijngaert: ende des arems roef is in v huys:

15

Wair om verduwe di mijn volc: Ende wair om vermager di der armer aensicht seit die here god vanden scaren.

16

Ende die here god seide Om dat die dochteren van sion verheuen sijn ende hebben ghewandelt met gherechte stiue halse. om dat sij ghinghen mitten wencken vanden oghen ende weygherden mitter hant. ende ghinghen voert mit haren voeten mit fieren gangen:

17

soe sal die heer calu maken den top vanden hoefde der dochteren van syon: ende hij sal haer haer ondecken.

18

In dien daghe sal die here af nemen die behagelheit vanden scuen Ende die ronde sciuen ende die halsbande.

19

ende die hecsel. ende die armillen ende die cronen ende die vlechten vanden hare.

20

ende pericheliden. ende die gulden kethenen ende die rukende vaten ende die inauren.

21

ende die vingherline. ende die preciose stenen die aen dat voerhoeft hanghen.

22

ende die behagel cledere. ende die mantelkijne. ende die lijnen lakene ende die rinaelden

23

ende die spieghelen ende die edele hoefcledere ende die huyuen ende die kelen.

24

Ende het sal wesen ouer den sueten roke stanc: ende ouer dat gordel een coerde: ende ouer crullende haer caluheit. ende ouer den borstbant een haren cleet

25

Oec sullen dijn alre schoenste mannen vallen mitten zwaerde: ende dijn starke inden stride

26

Ende haer poorten sullen drouen ende wenen: ende dat lant sal sitten bedrorft