Bible in duytsche (Delftse bijbel 1477)

§ Ca .ij.

1

DAt woort dat ysayas amos sone sach op iuda ende iherusalem.

2

Ende inden achtersten dagen sal sijn bereet die berch van des heren huus inden toppe der berghen: ende hij sal worden verheuen bouen die houelen. Ende alle heyden sullen te hem vloeyen:

3

ende vele volkes sullen gaen ende segghen. Coemt ende gae wi op tot des heren berghe. ende te iacobs gods huyse ende hi sal ons leren sijn weghe. ende wi sullen wandelen in sijne paden. want van syon sal wtcomen die wet: ende gods woert van iherusalem.

4

Ende hi sal oerdelen die heyden: ende sal berispen vele volkes. Ende si sullen smeden haer zwaerde inden ploech yseren: ende haer speren inden zekelen. Die lude en sullen ieghen die lude dat zwaert niet opheffen noch voertmeer en sullen si hem niet meer oeffenen tot stride.

5

Iacobs huys: coemt ende wandelen wi in ons gods licht.

6

Want du hebste verworpen dijn volc iacobs huys: want si sijn veruolt alsoe si wijlen waren. ende si hadden gheraders als philistijm: ende sij hielden hem aen vreemde kindere.

7

Dat lant

[p. *342]

is veruolt van siluer ende van goude: ende ten is gheen eynde van horen tresoren

8

Ende haer lant is veruolt van paerden: ende hare waghene en is ghene ghetal. Ende haer lant is veruolt van afgoden. Si aenbeden dat werc haerre handen: dat hare vingheren maecten.

9

Ende die mensche neyghede hem nederwaert: ende die man vernederde hem. Hier om en verlaets hem niet.

10

Ganc inden steen ende worde verborghen in die gracht mit aerden vanden aensichte des heren vresen: ende vander glorien sijnre moghentheit.

11

Die oghen des hoghes menschen sijn worden vernedert: ende die hoecheit vanden mannen sal neder worden gheboecht. Mer in dien daghe sal die here alleen worden verheuen:

12

want des heren dach vanden heren. comt op elken houaerdighen ende hoghen ende op elken hoghedraghenden. ende hi sal worden veroetmoedicht:

13

ende op alle die hoghe ende rechte opghescotene cederen van libano ende op alle eyken van basan.

14

ende op alle die hoghe berghe ende op die verheuen houelen:

15

ende op elken hoghen toorne ende op elke versekerde mure:

16

ende op alle die scepe van tharsis. ende op alle dat schoen is van aensien.

17

Ende alle hoocheit der menschen sal worden neder geboghen: ende die hoecheit der mannen sal worden vernedert. Ende in dien dage sal die here alleen verheuen worden:

18

ende die afgoden sullen altemael worden ghebroken.

19

Ende sij sullen gaen inden speluncke vanden stenen. ende inden dolaghen vanden lande vanden aensichte des heren ontsichelicheit. ende vander glorien sijnre moghentheit: als hi opstaen sal om dat lant te slaen

20

In dien daghe sal die mensche wech werpen die afgode sijns siluers ende die beelde sijns gouts die hi te sijnre behoef gemaect hadde: om te aenbeden molle ende vledermuse.

21

Ende hi sal gaen inden scoren vanden stenen. ende inden holen vanden rochen vanden aensichte des heren onsienlicheit ende vander glorien sijnre moghentheit: als hi opstaen sal om dat lant te slaen

22

Daer om rust v vanden mensche wies gheest is in sijn naselocken: want hij is die hoechste gheacht.