Bible in duytsche (Delftse bijbel 1477)

§ Ca. I

1

ISayas amos sone visioen: dat hi sach op iudam ende iherusalem in osias ioatham achas ende ezechias daghen der coninghen van iuda.

2

Hoert ghi hemelen ende aerde begrijpt mitten oren: want die here heuet ghesproken. Ic heb kinder op gheuoet ende verheuen: mer si hebben mij veronwaert.

3

Die osse kende sijnen besittere: ende die ezel sijns heren cribbe. Mer israhel en bekent mi niet: ende mijn volc en verstons niet.

4

Wee den besondichden luden: den zwaren volke van ongherechticheden den scalcken sade: den misdadighen kinderen. Si hebben gode ghelaten: si blasphemeerden den heylighen van israhel: si sijn af vervreemt achterwaert

5

Op wien sal ic v voertmeer slaen: ghi die daer toedoet die misdaet? Al dat hoeft is quellende: ende al dat hert drouende.

6

Vander planten sijns voets totten toppe van sijnen houede. soe en is in hem ghene ghesontheit. Die wonde ende die zwarte steden ende die zwellende wonde: en is niet omwonden noch ghenesen mit meesteren noch gheuoedet van olyen

7

V lant sal wesen woest. ende uwe steden sijn ontsteken mitten vyere. Vreemde luden verslinden v lantscap voer v: ende het sal worden bedroeft als in viantliker woesticheit.

8

Ende die dochter van syon sal worden ghelaten als een scaduwe inden wijngaert: ende als een hutte in een warmoeshof. ende als een stat diemen woest.

9

Ten waer dat die here vanden here ons hadde ghelaten saet. soe hadden wi gheweest als sodoma: ende als gomorra hadden wi ghelike gheweest.

10

Gi princen van sodoma hoert des heren woert: volc van gomorra verneemt uwes gods wet mit v oren.

11

Werwaert wildi mi mitter menichten van uwen offerhanden seit die here? Ic bin vol Holocauste van weders ende dat ruet van vetten beesten ende dat bluet van calueren ende van lammeren enden van bucken en woude ic niet.

12

Als gi quaemt voer mijn aenscouwen wie eysschede dese dinghen van uwen handen. dat ghi wanderen soudt in minen vrijthouen?

13

En offert voertane uwe offerhande niet te vergheefs. Die wieroec offerhande is mi een veronwaerden. Die neomenien ende den saterdach ende die ander feestelike daghen en sal ic niet verdraghen. Uwe vergaderinghen sijn ongherecht

14

Uwe calenden. ende uwe feestelike dagen heeft mine ziele ghehaet. Si sijn mi worden moeylijc. Ic hebbe gepijnt verdragende.

15

Ende als gi uwe handen wtsteken sult so sal ic mijn oghen van v afkeren: ende als ghi bedinghe menichfoudighen sult. so en sal ics niet horen. Want uwe handen sijn vol van bluede.

16

Wort ghedwogen. weest suuer: doet wech van minen oghen dat quade van uwen ghepensen. Rust v van verkeerdelike te duen:

17

leert wel te doen. Soect dat vonnisse: helpt den ghenen die onderghesteken is Vonnist den weesen. beschermt

[p. *341]

die weduwen:

18

ende coemt ende berispt mij seit die here. Ist dat v sonden sijn als ghele verwe. si sullen ghewit worden als die snee: ende ist dat si root sijn als vormelioen: si sullen sijn als witte wolle.

19

Ist dat ghi wilt ende ghi mi hoert: soe suldi dat guede vanden lande eten

20

Ende en wildi dies niet. ende verporredi mi te gramscapen: so sal v dat zwaert verslinden: want des heren mont heuet ghesproken.

21

Hoe is een hoere gheworden een ghetrouwe stat: vol van oerdele? Gherechticheit woenden in haer: mer nv woenre manslachtige in

22

Dijn siluer is verkeert in roestich scuym: dijn wijn is ghemenghet mit water

23

Dijn princen sijn onghetrouwe der dieuen ghezellen. Sij minne alle ghiften: si volghen den lonen na. Sij en vonnissen den weesen niet: ende der weduwen sake en comt niet in te hem.

24

Om dit sprac die here god vanden heren die stracke van israhel. Ach ic sal vertroest worden op mine vianden: ende ic sal worden ghewroken van minen vianden.

25

Ende ic sal mijn hant te di waert keren: ende ic sal verbranden ter suuerheit dijn roestich scuym: ende ic sal wech doen alle dijn tinnewerc.

26

ende ic sal wedersetten dijn rechters also si te voren waren ende dijn beraders alsoe si waren ten ouden tiden. Hier na sultstu worden geheten stat des gerechts: getrouwe poort

27

Syon al inden vonnisse worden verlost: ende si sullense wederbrenghen inder gherechticheit.

28

Ende god hi sal die misdadighe ende die sondaren te gader tonderdoen: ende die den here ghelaten hebben sullen worden verderft.

29

Want sij sullen hem scamen vanden afgoden dien si offerhande daden. Ende ghi sult v scamen op die prayeel houe die gi vercoren hadt

30

als gi wesen sult als een eyke daer die blader of vallen: ende als een prayeelhof sonder water.

31

Ende uwe starcheit sal wesen als een sprankel van wercke: ende uwe werken als ene spranckel: ende het sal beide te gader bernende werden. ende niemant en sal wesen diet blusschen sal