Bible in duytsche (Delftse bijbel 1477)

§ Capittel .l.

1

SYmon onyas soen die grote priester. die in sijnen leuen thuus ondersettede: ende in sijnen daghen verkeerde hi den tempel.

2

Oec was die hoocheit vanden tempel van hem gefondeert die dubbelde stichtinge ende die hoghe wanden vanden tempel.

3

In sijnen daghen wederuloeyden die putten van watere ende worden veruolt bouen maten als die zee

4

sijn volc besorchde ende verloste van verliese.

5

Die vermochte die stat te widene: die gewan die glorie inder luden wanderinghe: ende hi wide den inganc vanden huse enden vanden vrijthoue.

6

Ghelijc dat die dachsterre int midden den neuel: ende ghelijc dat die volle naem licht in haren daghen:

7

ende gelijc der blinckender sonne. also lichte hi inden tempel gods.

8

Als die blinckende boghe onder den neuel der glorien ende als der rosen blome inden dagen van lenten. ende als lelyen die sijn in ghelide van water: ende als welrukende wieroec inden dagen des somers.

9

Als blinckende vier ende wieroec barnende int vyer:

10

als een gheheel gulden vat dat verciert is mit allen preciosen stenen

11

Als een sprutende olyue: ende een cypres in hoocheden wassende. In dat hi ontfinc die stoel der glorien. ende ghecleet wort in volmaectheden der duecht:

12

inden opganc ten heylighen outaer so gaf hi glorie den mantel der heylicheit

13

Want inden ontfanghe die delen van der papen hant. ende hi staende neuen den outaer: ende omtrent hem was een rinc

[p. *337]

sijnre bruederen als cederen plante opten berch libanus:

14

also stonden si omtrent hem als eenre palmen telghere ende alle aarons sonen in haer glorie.

15

Want des heren offerhande was in haren handen voer alle die vergaderinge van israhel: ende hi ghebrukede des voldoens inden outaer: om te meerren des hoechsten conincs offerhande

16

hij stac sijn hant voert inder offerhande: ende schencte vanden wijndruuen bluede.

17

Den hoghen prince storte hij wt godlike roke ten fondamente vanden outare

18

Doe riepen aarons kinderen: ende si ludeden inden ghesleghen trompen: ende si deden horen groot gheluut inden ghedencken vore gode.

19

Doe quam al tvolc te gader toe: ende si vielen in haer aensichten op die aerde haren here taenbeden: ende te gheuen bedinghe den hoghen almachtighen god.

20

Ende si meererden hare stemmen singhende: ende int grote huus wort ghemeeret dat geluut vol sueticheden

21

Ende dat volc bad den hogen here in bedinghe tot des heren lof voldaen was: ende tot dat si sijne ghiften voldeden.

22

Doe quam hi neder. ende stac wt sine handen in alle die vergaderinghe der kinder van israhel: gode glorie te gheuen van sijnen lippen: ende in sijnen naem te verblijden.

23

Ende hi dede anderwerue sine bedinge: om dat hi die craht gods woude toghen.

24

Ende hi bat noch meer alre creaturen god: die grote dinghen dede in alle die werlt. die meerede onse daghen van onser moeder. ende mit ons heeft gedaen na sijnre groter ontfermherticheit.

25

hi moet ons gheuen vruechde van herten ende eweliken vrede te worden in israhel in onsen daghen

26

ende israhel te ghelouen dat mit ons gods ontfermherticheit is. dat hi ons verlossen moet in haren dagen.

27

Tweerhande luden haet mijn ziel: mer die derde en sijn gheen luden die ic hate.

28

Die sitten opten berch van seyr. ende die philistijm: ende dat sotte volc dat woent in sychem.

29

Ihesus sydrax soen van iherusalem screef in desen boec die const ende der discipline vander wijsheit vernyewede wt sijnre herten.

30

Salich is hi die in desen gueden dinghen wandert. Ende diese in sijnre herten leit. hi sal altoes wijs wesen.

31

Want ist dat hi dit duet so sal hi tot allen dingen guet sijn. wt dat licht gods is sijn voetstap