Bible in duytsche (Delftse bijbel 1477)

§ Ca .li.

1

COninc here ic sal di belyen: ende ic sal di louen god mijn behouder.

2

Ic sal dijnen naem belyen want du biste mij gheworden een hulper ende beschermer:

3

ende hebtste verlost mijn lichaem van verliese. vanden stricke eenre quader tonghe: ende vanden lippen die loghen werken: ende inder bistaenres aenscouwen bistu mijn hulper gheworden.

4

Ende du verlostes mi nader menichfoudicheit der bermherticheit dijns naems vanden briesschenden die bereit waren ter spisen:

5

ende vanden handen der gheenre die mijne ziele sochten. ende vanden poorten der vernoyen die mij ommeghinghen.

6

vanden persen der vlammen die mi omghinc: ende int midden den vyere en verbernde ic niet.

7

Vander diepheit der hellen buuc. ende vander besmetter tonghe. ende van dat woert des logens

[p. *338]

ende vanden bosen coninc: ende van die ongherechtighe tonghe

8

Mijn ziel sal totter doot den here louen:

9

ende mijn leuen was nakende nederwaert ter hellen.

10

Si ommeghinghen mi allesins: ende niemant en was die mi halp. Ic was siende totter menschen hulpe: ende si en was niet.

11

Here ic ghedachte dijnre ontfermherticheit. ende dijns mede werkens die vanden beghinne sijn

12

want du verloste die ghene die di ontbeiden. ende du verlostes haer vander heyden handen.

13

Du verhiefste bouen der aerden mijne woninghe: ende ic bad voer die ofuloeyende doot.

14

Ic aenriep den here den vader mijns heren: dat hi mi niet en late inden dage mijns vernoys. ende inder houaerdigher tijt sonder hulpe.

15

Ic sal eenpaerlijc dijnen naem louen. ende sallen louen in belyen ende mijne bedinghe wort verhoert.

16

Ende du verlostes mij van verliese: ende beschermes mi vanden onrechten tiden

17

Hier om sal ic di belyen ende di lof segghen: ende ic sal dinen naem benedien

18

als ic noch iongher bin. Eer ic dwaelde soe socht ic int openbaer in mijnre bedinge die wijsheit:

19

voert tijt eysschede ic om haer. ende tot inder vterster sal icse soken. ende sij sal bloeyen als ene versche druue.

20

ende mijn herte wort in haer verblijt: mijn voet wanderde den rechten wech: van mijnre ioncheit ondersocht icse.

21

Ende ic helde een luttel mijn ore neder: ende ic ontfincse

22

Ic vant veel wijsheden in mij seluen: ende ic deder veel profijts in.

23

Den ghenen die mij wijsheit gheeft sal ic glorie geuen

24

Want ic bin beraden dat icse doen soude: ic hebbe tgoede ghemint ende ic en sal niet bescaemt worden.

25

Mijn ziele heeft gheworstelt in haer: ende ic bin vast geworden in hare te doene.

26

Ic hief op mijn hande int hoghe: ende in haer wijsheit weende mijne ziele: ende hi verlichte mine onwetenheit.

27

Mijn ziele gheleide ic ter wijsheit waert: ende in bekennisse vant icse.

28

Ic besat mit haer therte vanden beghinne: daer om en sal ic niet worden ghelaten.

29

Mijn buuc wort ghestoert die wijsheit sokende: daer om sal ic besitten guede besittinge.

30

Want die here heeft mij ghegeuen die tonghe tot mijnen loue: ende daer in sal ic hem louen.

31

Ghi ongeleerde coemt tot mij waert: ende vergadert v int huus der disciplinen.

32

Wat verbeidi noch: ende wat segdi in desen? V zielen hebben anxteliken dorst.

33

Ic dede op minen mont ende sprac. Coopt tot uwer behoef sonder siluer wijsheit:

34

ende duet uwen hals onder haer ioc: ende uwe ziele ontfaet disciplyne. Want het is alre naest haer te vinden.

35

Siet mit uwen oghen want ic luttel ghepijnt hebbe. Ende ic hebbe tot mijnre behoef gheuonden vele rusten.

36

Neemt aen discipline in veel ghetale siluers: ende veel gouts besittet in haer.

37

V ziele sal verblijden in hare ontfermicheit: ende gi en sult niet worden bescaemt in haren lof.

38

Werct v werc voer tijt: ende het sal v loon gheuen in sijnen tiden.

Hier eyndet dat boeck datmen hiet ecclesiasticus.