Bible in duytsche (Delftse bijbel 1477)

§ Capitte .xlix

1

IOsias ghedencken is gheuonden inden werken van roke: eens speciers werck.

2

Sijn ghedencken sal versueten in elken mont als honich: ende als sueten sanc in die werscap van wijne.

3

Hi was godlijc ghesent ter penitencien vanden volke ende hi dede wech die onwaerdicheden der quaetheden:

4

ende hi beleide tot den heer waert sijn herte: ende inder sondaren daghen ghestarcte hi die guedertirenheit.

5

Sonder dauid ende ezechias ende iosias soe deden alle die coningen sonde:

6

want die coninghen van iuda lieten des almachtighen wet: ende veronwaerden gods vrese

7

Want sij gauen

[p. *336]

sijn riken den anderen. ende haer glorie vreemde gheboren volke.

8

Si verberneden die vercoren stat der heylicheit: ende si maecten woeste hare weghen In iheremias des propheten hant.

9

Want si handelden dien qualic. want die wt sijnre moeder buyc gheheylicht was prophete. auerecht te keren. ende te verlossen. ende te verliesen. ende weder te stichten ende te vernyewen.

10

Ezechiel die sach dat aenscouwen der glorien: die hem togheden inden waghen van den cherubin.

11

Want hi gedachte der vianden in reghenen: den ghenen wel te doen die toghen rechte weghen.

12

Ende der twaelf propheten beenre groeyen vander stat. Want si ghestarcten iacob ende verlosten hem inden gheloue haerre duecht.

13

Hoe sullen wi grotelic gheeeren zorobabel? Want hi is recht als een teyken in israhels rechter hant.

14

Ende ihesum iozedechs zoon? Die in haren daghen thuus stichten: ende verhieuen den heilighen tempel den here: bereet in eweliker glorien.

15

Ende neemias is in ghedencken van veel tijts: die ons oprecht die muren die auerecht gheworpen waren. ende hi dede staen die poorten ende die sloten: die onse husen oprechte.

16

Niemant en was gheboren in die werlt als enoch: want hi is opghenomen vander werelt.

17

Ende ioseph die een man gheboren was prince sijnre bruederen. vastheit des volcs. regeerde sijnre bruederen gestadicheit des volcs

18

ende sijnre beenre woerden gheuisyteert: ende si propheteerden nader doot.

19

Seth ende sem verdienden glorie voerden mensche: ende bouen allen zielen in adams beghinne