Bible in duytsche (Delftse bijbel 1477)

§ Ca .xlvi

1

IHesus nauolgher moysi inden propheten was starc in stride: die groot was na sijnen naem:

2

ende die alre meeste in gods vercoerne salichlijc: te verwinnen: ende den comende vianden dat hi ghecrighen soude die erfachtihede van israhel.

3

Welke glorie hi behaghede in op te heffen sine handen: ende te striden teghen die stede mitten zwaerde.

4

Wie wast die voer hem wederstont? Want die vianden versloech die here selue.

5

Ende en wort in sijnre gramscap die sonne niet ghehindert ende eenen dach wort also lanck als twe?

6

Hij aenriep den hoochsten machtighen in die vianden te vervechten allesins: ende die grote ende die heylighe god ghehoerden. in haghelstene ende in harder groter cracht.

7

Hi maecte gherucht teghen dat viantlike volc. ende inden nederganc verloes hij sijne vianden:

8

dat die vianden sijne macht bekennen sonden. wanttet teghen die here niet licht te vechten en is: ende hij volghede den machtighen nae van achter den rugghe.

9

Ende moyses daghen dede hi ontfermherticheit ende caleph iephone soen. te staen teghen den viant ende dat volc te verbieden van sonden: ende te doerbreken die murmuracie

[p. *333]

der quaetheit

10

Ende dese twe worden vander vresen verlost vanden ghetale van seshondert dusent mannen te voet ende si waren gheset in die erfachticheit te leiden: int lant dat vloeyt honich ende melc.

11

Ende die here gaf dien caleph starcheit: ende tot in sijn outheit bleef hem die cracht. dat hi opgaen soude in die stat vanden lande: ende sijn saet behielt die erfachticheit.

12

Ende dat alle die kinder van israhel hebben ghesien. wanttet guet is den heilighen god onderdanich te wesen.

13

Ende elke rechters bi sijnen naem: welker herte niet besmet en wort: die hem niet of en keert van den heer.

14

dat haer gedencken si in benedictien Ende dat haer beenre groeyen van hare stat:

15

ende haer naem gheduert ewelijc. ghedurende der heyligher mannen glorie an haer kinder.

16

Samuel des heren propheet was ghemint van sinen god. ende hi vernyewede dat rike: ende consacreerde die prince in sinen volke

17

In des heren wet oerdelde hi die vergaderinghe: ende sach iacobs god: ende in sijnen gheloue so wort hi een gheproeft prophet.

18

Ende hi wort bekent ende ghetrouwe in sijnen woerden: want hy sach gode des lichts.

19

Ende hi aenriep den almachtighen here int aenvechten der vianden die allesins ommestonden: inder offerande eens onbesmets mans.

20

Ende die here donrede vanden hemele: ende in groten ghelude soe dede hi horen sijne stemme:

21

ende hi doerbrac die princen van tyri. ende alle die leids heren van philistijm:

22

ende voerden tijt des eyndes sijns leuens ende die werelt gaf hi oec condscap in des heren aenscouwen ende cristi: en ontfinc van genen vleysche ghelt noch niet totten ghescoeyte: ende gheen mensche en beclaechde hem sijns:

23

ende hier na sliep hi. Ende hi dede bekennen den coninc saul ende toechde hem dat eynde sijns leuens: ende hi verhief sijn stemme vter aerden in prophecien om des volcs quaetheit