Bible in duytsche (Delftse bijbel 1477)

§ Ca .xlv

1

MOyses was van gode ghemint ende vanden menschen: wes ghedencken in benedictie is.

2

Hij maecte dien ghelijc inder heiligen glorie: ende hi verhief hem in die vrese der vianden: ende in sinen woerden vrede in die onghelouighe heydenen.

3

Hi eerden inder coninghen aenscouwen: ende hi geboot hem voer sinen volke: ende hi toechde hem sijn glorie.

4

In sine trouwe ende in sijne sachtmoedicheit maecte hi hem heilich: ende hi verkoes hem wt allen vleysche.

5

Want hi hoerden ende sijn stemme: ende hi leden inder wolken.

6

Ende hi gaf hem therte ten geboden. ende ter wet des leuens ende ter discipline ende te leren iacob sijn belofte: ende israhel sijn vonnisse.

7

Hi maecte aaron sijn broeder hoech: hem ghelijc vanden geslachte leui.

8

Hi sette hem ewelike beloften ende hi gaf hem dat priesterscap vanden volke ende hi maecten salich in glorien.

9

Ende hi ommegorden mitten gordel der gherechticheit: ende cleden mitter stolen der glorien: ende hi croenden inden vaten der duecht.

10

Behagele schuen ende nederclederen ende humerale maecte hi hem: ende omgorden al om ende omme mit veel gulden bellekijns:

11

te geuen gheluut in sinen inganc: te doen horen dat geluut inden tempel in een gedencken der kinderen sijns volcs.

12

Hi gaf hem die heilighe stole eens wijs mans gheweuen werc. van goude ende van iacincten ende van purper: die veruolt was mit vonnissen ende mit waerheden.

13

Dat werc eens wercmans van ghesponnender roden ziden. met preciosen stenen gheset. inghebonden van goude: ghegroueert mitten wercke eens lapidarius in een ghedencken: van tghetal der gheslachten van israhel.

14

Een gulden croen in sijn miter gheteykent mit teykenen der heilicheit: glorie der eeren ende dat werc der cracht: verciert mitter oghen begheerten.

15

Dus grote schoenheit en waren voer hem niet: totten beghinne.

16

Gheen vreemt gheboren en dede die an: mer alleen in sijn sonen: ende sijn neuen alle den tijt dore.

17

Sijn offerhanden worden daghelics verbrant mitten vyere.

18

Moyses veruolde sijn handen: ende besalfden mitter heiligher olyen.

19

Het is hem ghemaect in eweliker beloften ende sinen sade als die daghen des he-

[p. *332]

mels: ghebrukig te wesen priesterscap ende te hebben lof: ende te glorificeren sijn lof in sijnen naem.

20

Hi coessen wt allen leuenden menschen: te offeren gode sacrificie. ende wieroec ende gueden roke: in ghedencken ter vrede voer sijn volc.

21

Ende hi gaf hem die macht inden gheboden: inden beloften der vonnissen te leren iacob sijn oercondscap: ende israhel licht te gheuen in sijn wet.

22

Want teghen hem stonden vreemde: ende om hatyen so omstonden inder wildernissen die mannen die waren mit dathan. ende abieron: ende chore vergaderinghe in gramscappen.

23

Die here sacht ende ten genoechde hem niet: ende si worden bedoruen in den bedruusch der gramscap.

24

Hi maecte hem onsuuerheden: ende hi verderfdese in die vlamme des viers.

25

Ende hi dede aaron glorie toe: ende hi gaf hem erfachticheit: ende hi deelde hem die prouincien vanden vruchten vanden lande.

26

Inden eersten bereide hij hem broot in satheden want si sullen gods sacrificien eten: die hi hem gaf ende sijnen sade.

27

Mer voert en sal hi int lant niet die luden te erue hebben: ende hem en is gheen deel int volc. Want hi die here is sijn deel ende sine erfachticheit

28

Ende phinees eleazars soen is die derde inder glorien hem nauolghende in des heren vrese:

29

ende te staen in die waerdicheit vanden volke: in die guetheit. ende heerlicheit sijnre zielen ghenoechde hi gode van israhel.

30

Hier om sette hi hem belofte des vreden: ende prince der heilighen ende sijns volcs: om dattet hem ende sijnen sade sal wesen die waerdicheit van priesterscap ewelijc.

31

Ende hi settede belofte den coninc dauid iessen soen van iudas gheslachte: erfachticheit hem ende sijnen sade: om dat hi wijsheit gheuen soude in onse herten. om te vonnissen sijn volc in gherechticheden dat haer guet niet vergheten en soude worden: ende hi maecte haer glorie ewich in hem luden