Bible in duytsche (Delftse bijbel 1477)

§ Capit .xliiij

1

LOuen wij die glorose mannen ende onsen vaderen in haren gheslachten.

2

Die here heuet veel glorien gemaect. sijn grootheit is vander eweliker.

3

Heerscappie hebbende in haer moghentheden: grote mannen verciert in haer deucht ende in haer wijsheit: boetscappen den propheten der propheten waerdicheit.

4

ende regneerde in deser werelt: ende inder cracht haerre vroetscappen den volc beuelende die heilichste woerden.

5

In haer kintsheit ondersokende die mate vanden sueten sanghe: ende vertellen der scriftueren liedekijn.

6

Rike mannen der duechden: hebbende arensticheit der schoenheit: ende vrede in haren husen.

7

Alle dese verdienden glorie inden gheslachte haers volcs: ende in haer daghen heeft mense in loue.

8

Die van hem gheboren worden: lieten die namen te vertellen haren lof.

9

Ende sommighe sijn dier gheen ghedencken en is. Si veruoeren als of sij niet gheweest en hadden: ende si worden gheboren als of si niet gheboren en waren: ende haer kinderen mit hem.

10

Mer dat sijn mannen der ontfermherticheit: welker guedertierenheit. niet en gebraken.

11

Mer mit haren sade geduert die guede:

12

erfachticheit van haren heylighen neuen. Ende haer saet stont in die belofte:

13

ende haer kinder saet gheduert om haren wille tot inden eweliken. Haer saet ende haer glorie en sal niet worden ghelaten.

14

Haer lichamen sijn in vreden begrauen: ende haer namen sullen leuen in gheslachten ende tot gheslachten.

15

Haer wijsheit vertellen die volken: ende haren lof boetscapt die kerke.

16

Enoch ghenoghede gode: ende is ouergheuoert int paradijs omden heiden wijsheit te gheuen.

17

Noe wort geuonden volmaect ende gerechtich: ende inden tiden der gramscappen wort hi ghemaect in vreden.

18

Daer om wort hi gelaten ouerblijf der werelt: als die diluuie ghemaect wort.

19

Der werelt beloften waren bi hem gheleit: om dat alle vleisch niet en soude moghen worden ofgedaen mitter diluuie

20

Abraham. grote vader der menichte vanden heyden: sijns gelijc en was niet

[p. *331]

gheuonden inder glorien. Die behilt des alren hoechsten wet: ende hi was in beloften mit hem.

21

Hi dede die belofte staen in sinen vleysche: ende inder temptacien wort hi ghetrouwe gheuonden.

22

Hier om gaf hi hem mit rechte van ede glorie in sinen luden: hem te wassen als enen aerden berch.

23

ende sijn saet te verheffen als die sterren: ende dien erfachtich maken vander zee totter zee. ende vanden riuieren totten einden vander werlt.

24

Ende ysaac dede in deser seluer manieren: om abraham sijns vaders willen.

25

Die here gaf hem die benedictie van allen luden: ende sine beloften maecte hi vast in iacobs hoeft.

26

Hij bekenden in sine benedictie: ende hi gaf hem die erfachticheit: ende hi deelde hem sijn deel in twalef gheslachten.

27

Ende hi behilt hem die menschen der ontfermicheit: vindende gracie inden ghesichte van allen vleysche.