Bible in duytsche (Delftse bijbel 1477)

§ Ca .xliij

1

DAt firmament der hoecheit is sine schoenheit: des hemels ghedaente in aensien der glorien.

2

Die sonne inden aenscouwen boetscappende den wtganc: een wonderlic vat des alren hoechsten werc.

3

In die middaghe verbrant si die aerde: ende wie salt moghen aenscouwen of ghedogen dat aenscouwen haerre hetten? Si is huedende die fornaysen in werken der hetten

4

drieuoudelijc is die sonne verbernende die berghen: wtblasende vyerighe raeyen. ende blickende: in haren raeyen verblint si die oghen.

5

Groot is die here diese maecte: ende in sinen woerden haesten sij den wech.

6

Ende die mane is in allen in sinen tiden: een toghen des tijts. ende een teyken der ewicheit.

7

Vander manen is dat teyken vanden feesteliken daghe: dat licht dat ghemindert wort in einden.

8

Die mane die is na haren name: wassende wonderliken int einden.

9

Si is een teyken der scaren inden hoechsten: lichtende inden firmamenten des hemels die gloriose.

10

Schoenheit des hemels is die glorie vanden sterren: die here inden hoechsten die werlt verlichtende.

11

Si sullen staen ten oerdel in heilighen woerden: ende si en sullen niet gebreken in haren waken.

12

Besich den boge: ende looft hem dien maecte. Want hi is harde schoen in sijn claerheit.

13

Hi heeft den hemel omgheringhet elc om ende omme in sijnre glorien: des alren hoechsten handen deden op.

14

Bi sinen gebode so dede hi die snee haestelijc comen: ende hij haestede wt te senden blixem sijns vonnissen.

15

Hier om sijn die scatten ondaen ende die nevelen voeren wech als vogelen

16

In sijnre grootheit sette hi die wolken ende die stenen des haghels worden gebroken.

17

In sinen aenscouwen sullen die berghen beruert worden: ende in sinen wille so waeyt die zuyden wint.

18

Dat gheluut sijns donreslaghes sal die aerde slaen: die tempeest van noorden ende die vergaderinghe des wints:

19

ende also een vogel of bitende om te sitten. die snee henen drijft: ende als verdrenckende spelthanen is sijn nedercomen.

20

Die schoenheit sijns blinckens sal die oghen verwonderen: ende therte ontsiet van sinen regene.

21

Hi stort wt op dat lant die vorst als sout: ende alst bevroren is so salt worden als toppen vanden distel.

22

Die coude wint van noorden waeyde: ende hi vervroes cristal van water. Hi rust op alle vergaderinghe van water: ende als mit enen halsberghe sal hi hem cleden mit water.

23

Hi sal die berghen verslinden ende verbernen die wildernissen: ende hij salt groeyende blusschen als vyer.

24

Alre dingen medicine is int haesten des neuels: ende den douwe die der hetten teghen comt. sal hem die hetten minderen.

25

In sine woerden sal hi die wint ophouden ende mit sinen ghepense sachtede hi die afgronden: ende die here ihesus plantede dien.

26

Die in die zee mit scenpen varen vertellen haer vresen: ende als wijt horen mit onsen oren. so sullen wijs verwonderen.

27

Daer sijn voerbarighe ende wonderlike werken. menigherhande manieren van

[p. *330]

beesten ende van allen dieren: ende die creaturen van onghieren beesten.

28

Om hem is teinde vanden weghe vastgemaect: ende in sinen woerden sijn alle dinghen gemaect.

29

Wij sullen veel segghen ende ghebreken inden woerden: mer dat einde vander redene: is hi selue in allen dinghen.

30

Verblidende. waer toe sullen wi doghen? Want hi is almachtich bouen alle sinen werken

31

Die here is veruaerlijc ende die alre meeste anxtelijc: ende sijn macht is wonderlijc.

32

Looft den here: so gi alre meest moecht hi sal noch daer bouen vermogen ende sijn grootheit is te verwonderen.

33

Ende den here benedi ende verheften soe ghij meest moecht: want hi is meere dan alle lof.

34

Verheften ende wort veruolt mit doechden. Ende en arbeit niet: want ghi en sulter niet toecomen.

35

Wie sieten ende salt vertellen. ende wie sallen verheffen als vanden beginne?

36

Veel dinghen sijn verborgen meere dan dese. Want wi hebben luttel van sinen werken ghesien

37

Want die here heeft alle dinc gemaect: ende die weldoen heeft hi wijsheit ghegheuen