Bible in duytsche (Delftse bijbel 1477)

§ Capit .xlij.

1

EN segt niet tweewarf die reden dietstu ghehoert hebtste. vanden vertoghene eens verborghens woert: ende du sultse waerlijc wesen sonder scaemte: ende du sultste vinden gracie in alre menschen aenscouwen. Dattu van

[p. *328]

alle desen niet en wordes bescaemt: en ontfanc nyemants persoen op dattu niet en misdoetste.

2

Van des alren hoechsten wet ende testament. ende vanden vonnissen den quaden gherechte make

3

vander ghesellen ende wegheganghers woerden. ende vander vrienden erfachticheit te gheuen:

4

ende vander gelijcheit der waghen ende der ghewichten: ende van veel ende luttel te beiaghen:

5

ende vander bedriechnisse des copens ende der coepmannen. ende van veel disciplinen der kinderen: ende vanden quaetsten knecht bebluet dijn zide.

6

Op een scalc wijf is een guet teiken.

7

Daer veel handen sijn. besluut: ende so wattu gheuen sultste telt ende weghet: mer bescriue alle tghene dat ghegheuen is ende ontfaen.

8

Van eens onghesindes ende sots discipline ende vanden ouderen die geoerdelt worden vanden ionghelinghen. ende du sultste wesen gheleert in allen: ende te prisen in dat aenscouwen van allen mannen.

9

Des vaders dochter is verborgen sijn wrake ende sijn sorghe sal hem sijn slaep benemen: dat si machschien in haer ioncheit niet ouerspelinne en worde. ende datse mit haren man wonende niet hatende en worde:

10

dat si in haer suuerheit niet ontreint en worde. ende dat sij in haers vaders huus niet beswaert geuonden en worde: dat si machschien mit haren man wonende gheen ouerspel en doe: of dat si seker ondrachtich worde.

11

Maec vast die huede op een luxuriose dochter: dat si di gheen tijt en doe comen tot lachter dinen vianden. van quaet achtersprkende inder stat ende van ofsteken des volcs: ende dat si dij bescame in die menichte des volcs.

12

En wilt elc mensche niet merken in sine ghedaente: ende en wil niet ghedueren in die middewaert van wijuen.

13

Want wt die clederen comen die motten: ende wt den wiuen coemt eens mans quaetheit

14

Beter is eens mans quaetheit. dan een weldoende wijf: ende dan een wijf bescamende in lachter.

15

Hier om sal ic ghedencken sijns heren werken: ende dat ic gesien hebbe sal ic boetscappen. In des heren woerden sijn sine werken.

16

Die lichtende sonne sach al omme: ende mit des heren glorie is al sijn werc vol.

17

En dede die here die heilighen niet vertellen alle sine wonderen: die die almachtighe here vast ghemaect heeft gestadich te bliuen in sijnre glorien.

18

Hi sal ondersoken den afgront ende der menschen harten: ende hi sal voerpensen in haer behendicheit.

19

Want die here bekent alle const ende hi aenscouwet in teyken der ewicheit: boetscappende dat voerleden is. ende dat na te comen is: ondeckende die teykenen der verborghen dinghen.

20

Gheen ghepens en ontlidet hem: ende geen reden en verbercht haer van hem.

21

Die grootheden sijnre wijsheden heeft hi verschoent die voer die werlt is. ende tot inden eweliken: hem en is niet toe geworpen:

22

noch hi en sal niet worden ghemindert: ende hi en behoeft niemants raet.

23

Want alle sijn werken sijn begheerlijc: ende als een vonc die is te anmerken.

24

Alle dese sullen leuen ende dueren ewelijc: ende in alle noot sijn hem alle dinghen ghehoersaem.

25

Alle dinc is dubbelt: een teghen

[p. *329]

een: ende hi en deder niet ghebreken.

26

Hij sal teghen elcs guet versekeren: ende wie sal ghesadet worden. siende sijn glorie?