Bible in duytsche (Delftse bijbel 1477)

§ Capittel .xli.

1

O Doot hoe bitter is dijn ghedencken enen vreedsamighen man: ende die vrede heeft in sijn guet.

2

ende wies wegen

[p. *327]

in allen gherechtich sijn: ende die noch mach spise ontfaen.

3

O doot: dijns vonnisse is guet enen man die gebrec heeft ende dies cracht dat mindert:

4

ende gebrec van outheden. ende dien dat van alle sorghen is: ende die onghelouighe verliest die wijsheit.

5

En wilt niet ontsien dat vonnisse der doot. Ghedenc dat voer dij gheweest heeft: ende dat di toe te comen is. Dit oerdel is vanden here allen vleysche.

6

Ende dat dij opcomen sal inden alren hoochsten wille: weder het sijn thien iaer of hondert of dusent.

7

Want inder hellen en is gheen wroghen des leuens.

8

Kinder der onwaerdicheit. worden der sondaren kinderen: ende die wanderen neuen der quader husen.

9

Die erfachticheit der sondaren kinderen sullen veruaren: ende mit haren sade eenparicheit des lachters.

10

Vanden quaden vader soectmen die kinder: want si sijn om hem in lachter.

11

Wee v quade mannen: die des alren hoochsten wet verlaten hebt

12

Ende wordi geboren: so suldi worden geboren in maledictien: ende sterfdi so sal v deel in maledictien wesen.

13

Al dat van der aerden is sal weder in aerden keren also sullen die quade van vermaledijtheden in verliese sijn.

14

Der menschen gheween is in haren lichaem: mer der quader naem sal worden ofghedaen.

15

Hebbe sorghe in enen gueden naem: want die sal di langher gheduren. dan dusentich grote preciose scatten.

16

Van gueden leuen is een ghetal van daghen: mer die guede naem sal ewelijc duren

17

Kinder behout die disciplijn in vreden Want verborghen wijsheit ende onghesien scat: wat profijt is in beyden?

18

Beter is een man die verberghet sijn sotheit: dan een man die verberghet sijne wijsheit.

19

Mer nochtan wort bekeert tot dien: dat wt minen monde gaet.

20

Want ten is niet guet allene oneersaemheit ghehouden: ende alle luden en ghenoecht niet wel alledinc inder trouwen.

21

Scaemt v vanden vader ende vander moeder van onsuueren leuen.

22

ende vanden prelaet ende vanden machtighen vander loghenen: vanden princen ende vanden rechter vander misdaet: vanden synagoghen ende vanden volke vander quaetheit:

23

vanden ghezelle ende vanden vrient van ongherechtheden. vander stat daer du in woenste.

24

van dieften: van gods waerheden ende van sinen testament: vander maeltijt in brode. ende vanden verdonckeren in ghiften ende der wedergauen:

25

van die gruetende sijn van swighen: van aensien eens onsuuer wijfs. ende vanden ofkeren eens neuen aensichte

26

En keer dijn aensicht niet van dijnen naesten: ende van te nemen een deel. ende niet weder te gheuen.

27

En ansich niet eens vreemts mans wijf: ende en ondersoke sijn ioncwijf niet: noch en stant op haren bedde niet.

28

Wachte di van den vrienden van redenen des verwijts. ende alstu hem ghegheuen hebste en verwijts hem niet.