Bible in duytsche (Delftse bijbel 1477)

§ Capittel .xl.

1

GRote onledicheit is ghescepen allen menschen: ende een zwaer ioc op adams kinderen vanden daghe dat si comen wt hare moeder buyc. totten daghe des begrauens in alre creaturen moeder.

2

Haer ghepense ende in die vresen der herten: tfinden der ontbeidinghe. ende die dach des eyndes:

3

is vanden ghenen die bouen sittet op enen gloriosen stoel. totten ghenen die vernedert is tot op die aerde ende in die asschen:

4

van dien die besicht iacincten ende die trone draget. totten ghenen die ghecleet is mit raeu linen laken: toorn minne gerucht. onghestadicheit ende vrese der

[p. *326]

doot: ghedurende gramscap. ende strijt:

5

ende inden rusten opt bedde die nacht slaep verwandelt sinen wetenheit.

6

Luttel ende als niet in rusten: ende van hem in slape als inden daghe des aenscouwens.

7

Hi is verstoert inden visioen sijns herten: als een die ontlopen is inden daghe des strijts. Inden tide sijnre salicheit stont hij op. ende verwonderde tot gheenre vrese.

8

mit allen vleysche vanden menschen totten beesten: ende opten sondaren seuenuoudich.

9

Tot desen die doot bluet. ghestrijt. ende dat scarpe zwaert: verplettinghe. hongher. ende droefheit. ende geeselen.

10

Op die ongerechtighe sijn alle dese dinghen ghescepen: ende om haren wille wort die diluuie.

11

Want al dat vander aerden is. sal inder aerden wederkeren: ende alle wateren keren weder in die zee.

12

Alle ghiften ende ongerechticheit sal worden ofghedaen: mer die trouwe sal ewelijc staen.

13

Der ongherechtigher guet sal worden verdroecht als een riuiere: ende sal doerluden als een groot donreslach inden reghen.

14

In sijnen handen tontdoen sal hij verbliden: ende die sondaren sullen alsoe smelten int eynde.

15

Der quader neuen en sullen niet veel telgheren maken: ende donsuuer wortelen craken opt hoochste van enen steen.

16

Bouen allen wateren is groeyendeheit: ende ten canten vander riuieren. salmen al thoy of steken.

17

Gracie is ghelijc den paradise in benedictien: ende die ontfermherticheit duert ewelijc.

18

Dat leuen eens wercmans die hem seluen ghenoechlijc is: sal worden versuet: ende daer in sultstu vinden enen scat

19

Dat stichten eenre stat sal den name vastmaken: ende hier en bouen sal worden gherekent een suuer wijf.

20

Die wijn ende sueten sanc verblijdet dat herte: ende bouen beiden is die minne der wijsheit.

21

Die fleuten ende die sanctorien maken ene suete melodye: ende bouen beide is die suete tonge.

22

Gracie ende schoenheit sullen dijn oghe begheren: ende bouen dit sijn groene ghesaeyde vruchten.

23

Die vrient ende die ghezellen inden tiden vergaderen ende bouen beide is dat wijf mit enen man.

24

Ghebruederen in hulpe inden tide des vernoys: ende bouen hem sal die ontfermherticheit verlossen.

25

Gout ende siluer ende tsetten der voeten: ende bouen beide is welghenoghende raet.

26

Tgoet ende die cracht verheffen therte: ende bouen dese is des heren vrese.

27

In des heren vrese en is gheen veminderen: ende in hem en is gheen hulpe te soken.

28

Des heren vrese is als een paradijs der benedictien: ende bouen alle blijscap hebben se hem ouerdect.

29

Sone mijn en hebbe gheen ghebrec inden tiden dijns leuens. Want het is beter te steruen dan ghebrec te hebben.

30

Een man die scouwet in ene vreemde tafel: sijn leuen en is niet in ghepens der lijftochten. Want hi voedet sijn ziele mit vreemde spijse.

31

Mer een gheleert man ende ghemaniert. sal hem altoes wachten.

32

In eens onwijs mans mont sal dat gebrec versuet worden: ende in sinen buuc sal vier barnen.