Bible in duytsche (Delftse bijbel 1477)

§ Ca .xxxix.

1

EEn wise sal ondersoken alle der ouder wijsheit: ende hi sal hem inden propheten veronledighen.

2

Hi sal behouden dat vertellen van vernaemden mannen: ende hi sal oec ingaen in die bediinghe vanden parabolen.

3

Hi sal ondersoken die heymelicheden vanden woerden: ende hi sal gheduren inden verberghen der parabolen.

4

Ende int midden vanden groten luden sal hi dienen: ende in des rechters aenscouwen sal hi openbaren:

5

hi sal doerliden int lant van vreemden luden. Want guet ende quaet sal hi in allen prouen.

6

Hi sal sijn herte gheuen vroech te waken totten here dien gemaect heeft: ende hi sal aenbeden in des alren hoechsten aenscouwen.

7

Hij sal sijn mont opdoen in bedinghe: ende hij sal bidden ouer sijn sonden.

8

Want wilt die grote heer so sal hi hem veruollen mitten gheest der verstandenisse:

9

ende hi sal altoes als stof regenen senden die sprake sijnre wijsheit: ende inder bedinghe sal hi den here louen.

10

Ende hi sal sijnen raet ende sine discipline beleden: ende in sijnre heymelijcheit sal hi hem beraden.

11

Hi sal openbaer maken die discipline sijnre leringhe: ende hi sal verbliden inder wet van des heren testament.

12

Vele luden sullen prisen sine wijsheit: ende hi en sal niet worden ofghedaen tot inden eweliken

13

Sijn ghedencken en sal niet vergaen: ende sijn naem sal worden versocht van gheslachten in gheslachte.

14

Sijn wijsheit sullen die heyden vertellen: ende sine lof sal die kerke boetscappen.

15

Ist dat sijn naem geduert soe sal hij er meer dan dusent laten: ende ist dat hij doot is soe salt hem helpen:

16

noch sal ic beraden worden om te vertellen: want ic bin veruolt als van toorne.

17

Hi seide in stemme. Gehoert mi godlike vruchten: ende maect vrucht als rosen die gheplant sijn op een beke van water.

18

Hebt roke der sueticheit. als die libanus.

19

Bloeyt ghi blomen als die lelye ende gheeft roke: ende bloeyt in gracien. ende priset die lyedekijn: ende ghebenediet den here in sijnen werken.

20

Ende gheeft grootheit sijnen naem: ende belijt hem inden ghelu-

[p. *325]

de uwer lippen: ende in harpen ende in lyedekijns der lippen: ende dus suldi segghen in belyen:

21

ende alle des heren werken sijn seer guet.

22

Want in sijnen woerden stont dat water als enen berch ende inden redenen sijns monts stont als ene vergaderinghe van water:

23

want in sinen gebode soe wert sachtinghe: ende gheen verminderen en is in sijnre salicheit.

24

Die werken van allen vleyschen sijn voer hem: ende niet en is verborghen van sijnen oghen.

25

Hi salt aenscouwen vanden beghinne tot inden eynden: ende niet en is wonderlijc in sinen aenscouwen.

26

Ten is niet te segghen. wat is dit of wat is dat: want alle dinghen salmen soken tot haren tiden.

27

Sijn benedictie sal oueruloeyen als ene riuier

28

ende gelijc dat die diluuie die aerde veruolde: also sal sine gramscap die heydene die niet en versuchten tot erfachticheden ontfaen.

29

Gelijc dat hi dat water verwandelde in deoecheden. ende die aerde ghedroecht wort: ende also sine wege mit haren weghe beleyt sijn: also sijn die sondaren verbelghinghe in sijnre gramscap.

30

Den gueden sijn guede dinghen ghescepen vanden beghinne: also sijn den quaden die guede ende die quade dinghen ghescepen.

31

Dat beghinsel van notorftigher dinc ter menschen leuen water. vyer. ende yser: sout. melc. ende broot van blomen: ende honich. ende wijn ende olye. ende cleet.

32

Alle dese worden den gueden int guet: ende den quaden ende den sondaren in quaden verkeert.

33

Gheesten sijn die ghescepen sijn ter wrake: ende in haer verwoetheit soe hebbense haer tormenten vast ghemaect.

34

Ende inden tiden des eyndes sullense haer cracht wtstortten: ende sullen des gheens toren die hem maecte bescamen.

35

Vier. haghelstenen. hongher ende die doot: alle dese dinghen sijn ter wraken ghescepen.

36

Beesten tanden ende scorpioenen. ende serpenten: ende dat wrekende zwaert inder quader verderfnisse

37

Si sullen werscappen in sinen gheboden: ende sullen op dat lant worden bereet inder nootsaken: ende in haren tiden en sullense een woort niet ouerliden.

38

Ende hier om bin ic van beghinne vast ghemaect: ende ben beraden. ende ic hebt ghepenst: ende laten ghescreuen.

39

Alle des heren werken sijn guet: ende elc werc sal in sijn vre dienst doen.

40

Ten is niet te segghen: dit is quader dan dat. Want alle dinghen souden tot horen tiden worden gheproeft:

41

ende nv soe loeft in alle v herte ende in uwen mont: ende benedijt des heren naem.