Bible in duytsche (Delftse bijbel 1477)

§ Ca .xxxviij

1

EEr den medecijn om die noot: want die alre hoochste heeftse ghescepen.

2

Van gode is alle ghenesen: ende vanden coninc sal hi ontfaen ghiften.

3

Eens medecijns disciplijn sal sijn hoeft verheffen: ende hi sal worden gheprijft inder groter luden aenscouwen.

4

Die alre hoochste sciep vander aerden die medecijn: ende een wijs man en salse niet verheysschen

5

En wort bitter water niet suet van enen houte?

6

Ende ter menschen bekennen is haer cracht ende die alre hoochste heeft den mensche

[p. *323]

gegeuen const: om geeert te worden in sinen wonderen.

7

In desen dinghen genesende sal hi die pine sachten: ende een salue maker sal maken pigmenten der sueticheit ende sal make salue der ghesontheit: ende sijn werke sal niet worden voleyndet

8

Want gods vrede is op dat aensicht vander werlt.

9

Sone en versmade dij seluen niet in dijnre siecheit: mer bidde gode. ende hi sal dij ghenesen.

10

Keer di of van sonden. ende beleide dine handen: ende van alre misdaet suuer dijn herte.

11

Ghif die sueticheit ende dat ghedencken van blomen: ende make die offerhande vet: ende ghif stat den medecijn.

12

Want die here heeften ghescepen: ende hi en gae van di niet wech: want sijn werken sijn notorftich.

13

Want die tijt is dattu in sijnen handen comen sultste:

14

mer si sullen den heer bidden dat hi haer ruste beleyde. ende haer ghesontheit om haer wanderinghe wille.

15

Die misdoet in des gheens tegenwoerdicheit dien gemaket heeft: hi sal in des medecijns handen vallen.

16

Soen laet tranen opten doden. ende als oftu zwaer dinghen ghedoghes so beghinne te wenen: ende na rechten vonnisse so bedect finen lichaem: ende en versmade sijn begrauen niet.

17

Om die quaetsprekers soe doe bitterlijc sijn gheween enen dach: ende worde vertroest om die sericheit.

18

ende doch gheween na sine verdiente enen dach of twe. om die achter spraeck

19

Want vander sericheit haest die doot. ende verdect die starcheit: ende der herten droefheit crommet den necke.

20

Inder verleidinghe gheduert die sericheit: ende eens maets menschen guet na sijn herte.

21

En ghif dijn herte niet in sericheit: mer steecse van di: ende ghedencke der lester.

22

En wils niet vergeten. want ten is gheen wederkeren: ende du en sultste hem niet vorderen: ende du sultste di seluen veriaghen.

23

Wes ghestadich dijns oerdels: want alsoe salt dine sijn. Mi wast ghisteren ende huden dij.

24

Indes dodes rusten doch rusten sijn ghedencken: ende vertroesten inden wtuaren sijns gheesten.

25

Scrijf wijsheit inden tiden der ledicheit: ende die vermindert in sijn daet sal die wijsheit gheuoelen:

26

want hi sal mit wijsheden worden veruolt Die die ploech houdet ende die verblijdet inden ghescutte. hi drijft die ossen mitter garden: ende hi wandelt in haren werken: ende sijn vertellen is inder stieren kinder.

27

Hij sal sijn herte gheuen om die voere te keren: ende sijn waken is inder coeyen vetheit.

28

Ende aldus is elc smit ende die meester vanden wercluden. die den nacht als den dach ouerlijt: die grauet ghegroueerde teikenen: ende sijn naersticheit verwandelt die verwe. Hi sal sijn herte gheuen in ghelikenisse der verwen ende sijn waken voldoet sijn werc.

29

Aldus duet die yser smit sittende neuens dat aenbelt: ende merkende dat werc vanden yser. Die hette vanden viere verbarnt sijn vleysch: ende hi arbeit inder hetten vanden fornayse

30

Dat gheluut vanden hamer sal sijn oren vernyewen: ende sijn oghen sullen sijn teghen die ghelikenisse vanden vate.

31

Hi sal sijn herte geuen dat werc te volmaken: ende in sijnen waken sal hi die onvolmaecthet vercieren

[p. *324]

32

Aldus is die pottemaker sittende tot sinen werc ende mit sinen voete dat wiel kerende: dien altoes in arensticheden gheset is om sijn werc: ende al sijn werc is ouertellic.

33

In sinen armen sal hi die modder formeren: ende voer sine voeten sal hi crommen sine cracht.

34

Hi sal sijn herte gheuen om te veruollen die bestrikenis: ende in sijnen waken sal hi tfornayse suueren.

35

Alle dese hoepte in hare handen elc is wijs in sijn ambocht.

36

Sonder alle dese en stichtmen ene stat niet:

37

ende si en sullenre niet in wonen. noch wanderen: noch ouerliden inder vergaderinge.

38

Si en sullen niet sitten op eens rechters stoel. ende en sullen die ordinancie vanden vonnissen niet verstaen: noch si en sullen niet openbaer maken die discipline ende dat vonnisse: ende si en sullen niet worden gheuonden inden parabolen:

39

mer een cratuer des beghinnens sullen si vast maken: ende haer bedinghe is in die werken haers ambochts. Haer zielen daer toe lenende. ende beclaghende in des alre hoechsten wet