Bible in duytsche (Delftse bijbel 1477)

§ Capittel .xxxvij.

1

ELc vrient sal segghen. ic hebbe vrientscap vergadert: mer het is alleen een vrient van namen. En isser die droefheit niet in totter doot

2

Want die gezelle ende die vrient. sullen worden bekeert te viantscap.

3

O alte scalke ouerdaet. waer of bistu ghescepen te ouerdecken die droghe quaetheit ende haer boesheit?

4

Een ghezelle wort vervruecht mitten vrient in ghenoechten ende inden tiden des vernoys sal hi wedersake sijn.

5

Die ghezelle heeft rouwe om sijns vrients rouwe om die sake sijns buucs: ende hi sal een scilt nemen teghen den viant.

6

Ende en vergheet dijns vrients niet in dijnre ghedachten: ende en wes niet onghestadich sijns in dijnen werken.

7

En wil ghenen raet hebben mit dijns wijfs vader: ende vanden ghenen die di beniden verberch den raet.

8

Elc raetsman sal den raet voertbrengen mer tis eenrehande raetsman in hem seluen.

9

Vanden raetsman houde dijn ziel Du sultste eerst weten wat sijn nootsake is: ende wat hi in sijnre ghedachten penst.

10

Dat hij mathschien een stake niet en steke in die aerde: ende di segge

[p. *322]

11

dijn wech is guet: ende hi dan staet teghen di te sien wat di gheschien sal.

12

Mit enen onreligiosen man so spreec van heylicheden: ende mit enen ongherechtigen vander gherechticheit. ende enen wiue van dien dat benidet. Mitten blueden vanden stride: mitten vercoper vanden verliese. Mitten coopman vanden vercoper mitten benider van te dancken. Mitten ongheuadighen van guedertierenheden.

13

Mitten oneersaemen van eersaemheden. Mitten ackerman van allen werken:

14

mitten iaerliken wercman vanden eynde ende vnaden iare: mitten traghen knecht van veel te werken. En ghif di hier toe niet in allen raden.

15

Mer wes sonderlinghe dicwile mitten heilighen man: soe wien dattu bekendes houdende die vrese gods:

16

wies ziel is na dijn ziel. Soe wie wandert in donckerheit hi en sal op dinen rouwe niet serighen:

17

ende sette mit di een herte van goeden rade. Want di en is anders niet meer dan hem.

18

Eens heilichs mans ziele boetscapt sulken tijt waerheden: meer dan seuen wachters die int hoghe sitten om te scouwen.

19

Ende in allen desen bidden den hoochsten heer: dat hi in waerheden dinen wech beleyde.

20

Voer alle werken sal dat ghewarighe woort voer di gaen: ende voer al dat werc ghestadich raet.

21

Een scalc woort sal therte verwandelen. vten welken die vier delen risen: dats guet ende quaet dat leuen ende die doot: ende die vruechde daer bouen heerscappie hebbende is die clappende tonghe.

22

Een gheleert man leerter vele: ende hi is in sijnre zielen suet.

23

Die bedrieghelijc spreect hi is te haten: ende hij sal van alle dinc worden ghehoent.

24

Hem en is vanden here ghene gracie ghegeuen: want hem is alle wijsheit ghenomen.

25

Een wijse is sijnre zielen wijs. ende die vruchten sijns sins: sijn ghetrouwe

26

Een wijs man leert sijn volc. ende die vruchten sijns sijn ghetrompen.

27

Die wise man sal veruolt worden mit benedictien ende die dien sien. sullen prisen.

28

Eens mans leuen is in ghetale van daghen: mer israhels daghen sijn ouertellijc

29

Die wijse sal inden volke eer te erue ontfaen: ende sijn naem sal ewelijc leuende sijn.

30

Sone in dinen leuen proue dijne ziel: ende is si scalc soe en ghif haer gheen macht.

31

Want alle luden en betamen alle dinc niet: ende elker zielen en ghenoecht elc geslacht niet.

32

En wilt niet te ghierich wesen in alle werscap: ende en stortte dij niet wt op elke spijse.

33

Want in veel spisen sal wesen onghesontheit: ende die ghiericheit sal ghenaken totter coleren.

34

Om der spisen ghericheit sijn veel luden ghestoruen: mer die sober is sal sijn leuen verlanghen